ސްރީ ލަންކާގެ އާ ރައީސް އަނޫރަ ކުމާރަ ޑިސަނަޔަކަ (އޭކޭޑީ) މިއަދު މަގާމުގެ ހުވާކުރައްވައިފި އެވެ.

އާދީއްތަ ދުވަހު ބޭއްވި އިންތިހާބު 55 އަހަރުގެ އޭކޭޑީ ކާމިޔާބުކުރެއްވީ 37 ކެންޑިޑޭޓަކާ ވާދަކޮށެވެ. ލަންކާގެ ރައީސްކަމުގެ ހުވާ މިއަދު އޭނަ އަށް ލައި ދެއްވީ ގާނޫނު ހަދާ މަޖިލީހުގައި އޮތް ރަސްމިއްޔާތެއްގައި އުއްތަމަފަނޑިޔާރެވެ.

އޭކޭޑީ އަކީ ލަންކާގެ 9 ވަނަ ރައީސެވެ.

Advertisement

ޑިސަނަޔަކަ އިންތިހާބު ކާމިޔާބު ކުރެއްވީ ޕްރިފެރެންޝަލް ވޯޓުތަކާއެކު ޖުމްލަ 5.74 މިލިއަން ވޯޓުންނެވެ. އޭނައާ އެންމެ ގާތުން ވާދަ ކުރެއްވި ސަމާގީ ޖަނާ ބަޓަވެގަޔާ (އެސްޖޭބީ) ގެ ކެންޑިޑޭޓް ސަޖިތު ޕްރެމަޑާސާ އަށް ލިބިވަޑައިގެންނެވީ 4.5 މިލިއަން ވޯޓެވެ.

ޕީޕަލަސް ލިބަރޭޝަން ޕާޓީ (ޖޭވީޕީ) އަށް ނިސްބަތްވާ އޭކޭޑީ އަކީ ލަންކާގެ ގާނޫނު ހަދާ މަޖިލީހުގެ މެންބަރުކަން ވެސް ދިގު މުއްތަކަށް ކުރައްވާފައުވާ އަދި ކުރިން މިނިސްޓަރުކަން ވެސް ކުރެއްވި ބޭފުޅެކެވެ. އޭނަ ކުރިން އެގްރިކަލްޗަ، ލޭންޑް އެންޑް ލައިވްސްޓޮކް މިނިސްޓަރުކަމުގެ މަގާމު އަދާކުރެއްވި އެވެ. އެއީ 2000-2004 އަށެވެ.

ލަންކާގެ ރައީސްގެ މަގާމުގައި އެންމެ ފަހުން ހުންނެވީ އާދީއްތަ ދުވަހުގެ އިންތިހާބުގައި ވެސް ވާދަކުރެއްވި ރަނިލް ވިކްރަމަސިންހަ އެވެ.