ސްރީ ލަންކާގެ އައު ރައީސް އަނުރަ ކުމާރަ ދިސަނާޔަކޭ އެގައުމުގެ ޕާލިމަންޓު އުވާލައިފިއެވެ.

ލަންކާ ސަރުކާރުގެ ގެޒެޓުގައި ޝާއިޢުކޮށްފައިވާ ނޯޓިސްއެއްގައިވާ ގޮތުން، އިންތިޚާބު ބޭއްވުމަށް ހަމަޖެހިފައިވަނީ ނޮވެމްބަރު 14 ވަނަ ދުވަހުއެވެ. މިއީ ޕާލަމެންޓްގެ ގާނޫނީ މުއްދަތު ހަމަވާ ތާރީޚަށްވުރެ ގާތްގަނޑަކަށް އަހަރެއް ހާ ދުވަސް ކުރިއެވެ.

ރައީސް ވަނީ އޭނާގެ އެކުވެރިޔާ ޑރ. ހަރިނީ އަމަރަސޫރިޔާ ލަންކާގެ ބޮޑުވަޒީރު ކަމުގެ މަޤާމަށް އަންގާރަ ދުވަހު ޢައްޔަނުކުރައްވާފައެވެ. މިއީ ޤައުމުގެ ތާރީޚުގައި އަންހެނަކު މި މަޤާމަށް ޢައްޔަނުކުރި ތިންވަނަ ފަހަރެވެ.

Advertisement

ދިސަނާޔަކޭ ވަނީ ހޮނިހިރު ދުވަހު ބޭއްވުނު ރިޔާސީ އިންތިޚާބު ކާމިޔާބުކުރައްވާފައެވެ. އޭނާ ވަނީ އިންތިޚާބުވެވަޑައިގަތުމާއެކު ޕާލިމަންޓު އުވާލާނެކަމަށް އިޝާރާތްކޮށްފައެވެ. އަދި އޭނާގެ ސިޔާސަތުތައް ކުރިއަށް ގެންދިއުމަށް އައު މެންޑޭޓެއް ހޯދުމަށް މަސައްކަތްކުރާނެކަމަށް ވިދާޅުވެފައިވެއެވެ.

ސްރީ ލަންކާގައި އެންމެފަހުން ބޭއްވުނު އާންމު އިންތިޚާބަކީ 2020 ވަނަ އަހަރުގެ އޯގަސްޓު މަހުގައި ބޭއްވުނު އިންތިޚާބެވެ. މި އިންތިޚާބުގައި މެންބަރުން އިންތިޚާބުކުރެވުނީ 5 އަހަރުގެ ދައުރަކަށެވެ.

ދިސަނާޔަކޭގެ އެންމެ ބޮޑު ގޮންޖެހުމަކަށް ވެފައިވަނީ އިންޓަނޭޝަނަލް މަނިޓަރީ ފަންޑު (އައި.އެމް.އެފް) އިން ލިބިފައިވާ 2.9 ބިލިއަން ޑޮލަރުގެ ސަލާމަތީ ޕެކޭޖުގެ ބައެއް ބައިތައް އަލުން މަޝްވަރާކުރުމެވެ. މި ޕެކޭޖުގެ ސަބަބުން ގިނަ އަދަދެއްގެ ރައްޔިތުންނަށް ދަތިތަކާ ކުރިމަތިލާން ޖެހިފައިވެއެވެ.

އައު ބޮޑުވަޒީރު އަމަރަސޫރިޔާ އަކީ ކުރީގެ ޔުނިވަރސިޓީ ލެކްޗަރަރއެކެވެ. އަދި އޭނާއަށް ވަނީ އިންސާފު، ތަޢުލީމު އަދި މަސައްކަތުގެ ވުޒާރާތަކުގެ ޒިންމާވެސް ޙަވާލުކުރެވިފައެވެ. 54 އަހަރުގެ އަމަރަސޫރިޔާ ވަނީ 2011 އިން ފެށިގެން ހިލޭ ތަޢުލީމަށް ގޮވާލާ އެކިއެކި މުޒާހަރާތަކުގައި ބައިވެރިވެފައެވެ. އަދި އޭނާއަކީ ޒުވާނުންގެ ތަރައްޤީއާއި، ކުޑަކުދިންގެ ރައްކާތެރިކަމާއި އަދި ޖިންސުގެ ހަމަހަމަކަން ފަދަ އިޖުތިމާޢީ އިންސާފުގެ މައްސަލަތަކަށް ވަކާލާތުކުރާ ފަރާތެއްގެ ގޮތުގައި މަޝްހޫރު ބޭކަނބަލެކެވެ.