ކުޑަކުދިންގެ މެދުގައި ނޭވާލުމުގެ ނިޒާމަށް ޖެހޭ ބައްޔެއް ޢާންމުވަމުންދާތީ އެކަމަށް ސަމާލުވުމަށް ހެލްތު ޕްރޮޓެކްޝަން އޭޖެންސީ އެޗްޕީއޭއިން އިލްތިމާސްކުރައްވައިފިއެވެ.

ހެލްތު ޕްރޮޓެކްޝަން އޭޖެންސީން ވިދާޅުވީ، ނޭވާލާ ނިޒާމަށް ޖެހޭ ބައްޔެއްކަމުގައިވާ ރެސްޕިރޭޓްރީ ސެންސޭޝަލް ވައިރަސް(އާރް.އެސް.ވީ) ކުޑަކުދިންގެ މެދުގައި ޢާންމުވަމުންދާކަމަށެވެ. އެހެންކަމުން ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭއިންވަނީ ޢާންމުންނަށް އިލްތިމާސްކުރައްވާފައެވެ. ކުޑަކުދިންގެ މެދުގައި ބަލި ފެތުރުން ކޮންޓްރޯލްކުރުމަށް ޚާއްސަ ސަމާލުކަމެއް ދެއްވުމަށް އެޗްޕީއޭއިންވަނީ އެދިވަޑައިގެންފައެވެ. އަދި ޢާންމު ސާފުތާހިރުކަމަށް ސަމާލުކަންދިނުމަށާއި، ގައިން ގަޔަށް އަރާ މިބަލިން ރައްކާތެރިވުމަށް މީހުން ގިނައިން އެއްވާ ތަންތަނަށް ކުޑަކުދިން ނުގެންދިޔުމަށްވެސް އެޗްޕީއޭއިން އިލްތިމާސްކުރައްވައެވެ.

ރެސްޕިރޭޓްރީ ސެންސޭޝަލް ވައިރަސް(އާރް.އެސް.ވީ)އަކީ ނޭވާލާ ނިޒާމަށް ޖެހޭ ޢާންމު ވައިރަސްއަކުން ޖެހޭ ބައްޔެކެވެ. ބަލީގެ ނުރައްކާ ބޮޑުވަނީ ތުއްތު ކުދިންނާއި، ޢުމުރުން ދުވަސްވީ މީހުންގެ މެދުގައެވެ.

ބަލީގެ ސަބަބުން ގައިން ފެން މަދުވުމުގެ ސަބަބުން ކުރިމަތިވާ އެކި ސިއްޙީ ނުރައްކާތަކުން ސަލާމަތްވުމަށް ގިނަ ގިނައިން ދިޔާތަކެތި ބޭނުންކުރުމަކީ މުހިންމުކަމެއްކަމަށްވެސް އެޗްޕީއޭއިން ވިދާޅުވެއެވެ.