ސަލްމާން މިސްކިތުގެ އިމާމެއް ކަމަށްވާ ޑެޕިއުޓީ މިނިސްޓަރ އަބްދުލްޖަލީލް އިސްމާއިލް ލިޔުންތަކެއް ފޯޖް ކުރިކަމަށް ބުނާ މައްސަލައެއް ތަހުގީގު ކުރަމުންދާ ކަމަށް ފުލުހުން ވިދާޅުވެއްޖެއެވެ.

މީޑިއާތަކަށް ފުލުހުން ފޮނުވި މެސެޖެއްގައި ވިދާޅުވީ އެ މައްސަލަ ފުލުހުންނަށް ހުށަހަޅައިފައި ވަނީ މިމަހުގެ 19، ގައި ކަމަށެވެ.

ޖަލީލު ލިޔުންތަކެއް ފޯޖް ކުރިކަމުގެ ތުހުމަތު ކުރަނީ 2022 ވަނަ އަހަރުގެ ޖެނުއަރީ 02 ގައި މާފަންނު ގެއެއްގެ ތެރޭގައި މަރުވެފައި އޮއްވައި ފެނުނު ހއ.ހޯރަފުށި، ޑީންސްވިލާގޭ، ހާޝިމް މުހައްމަދުގެ އާއިލާއިންނެވެ.

Advertisement

ހާޝިމްގެ އާއިލާއިން ތުހުމަތު ކުރަނީ ލިޔެކިޔުންތައް ބަދަލު ކޮށްގެން ހާޝިމްގެ ހުރިހާ ވިޔަފާރިތަކެއް ޖަލީލުގެ ނަމަށް ބަދަލުކޮށްފައިވާ ކަމަށެވެ.

ހާޝިމްގެ އާއިލާ މެންބަރުންތަކަކާއި ޖަލީލު އާ ދެމެދު ފިހާރައެއްގެ ތެރޭގައި މިދިޔަ ހަފްތާގައި ހަމަނުޖެހުމެއް ވެސް ހިނގި މަންޒަރު ފެންނަ ވީޑިއޯއެއް ސޯޝަލްމީޑިއާގައި އާންމުވެފައި ވެއެވެ. އެ މައްސަލަ ވެސް ތަހުގީގު ކުރަމުންދާ ކަމަށް ފުލުހުން ވިދާޅުވިއެވެ. ނަމަވެސް މުދަލާއި ގެދޮރުގެ މައްސަލަތައް ސިވިލް ކޯޓަށް ހުށަހަޅައިގެން ކުރިއަށް ގެންދިޔުމަށް ހާޝިމްގެ އާއިލާއަށާއި ޖަލީލުއަށް ވެސް އިރުޝާދު ދީފައިވާނެ ކަމަށެވެ.

ހާޝިމްގެ މަރުގެ މައްސަލައިގައި ޝައްކު ކުރެވޭ ކަންތައްތަކެއް ހުރުމުން އެ މައްސަލައިގެ ތަހްގީގު ފެށިގެން އެދުވަސްވަރު ފުލުހުން ހާމަކުރިއެވެ. ނަމަވެސް މައްސަލަ އާއި ގުޅޭ އިތުރު އެއްވެސް ތަފްސީލެއް ފުލުހުން ފަހުން ހާމަކޮށްފައެއް ނުވެއެވެ.