ސްޕެނިޝް ލީގުގައި ރޭ ރެއާލް މެޑްރިޑާއި އެތްލެޓިކޯ މެޑްރިޑް ބައްދަލުކުރި މެޗު 1-1 އިން އެއްވަރުވެގެން ނިމިއްޖެ އެވެ.

މި ނަތީޖާއާއެކު އަށް މެޗުން ލިބުނު 18 ޕޮއިންޓާ އެކު ރެއާލް އޮތީ ލީގުގެ ދެވަނައިގަ އެވެ. ތިންވަނައިގައި 16 ޕޮއިންޓާ އެކު އެތްލެޓިކޯ މެޑްރިޑް އޮތްއިރު އެއްވަނައިގައި 21 ޕޮއިންޓާ އެކު އޮތީ ބާސެލޯނާ އެވެ.

އެތްލެޓިކޯގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައި ނުވާއިރު، މެޗުގެ 64 ވަނަ މިނެޓްގައި އެޑާ މިލިޓާއޯ ވަނީ ރެއާލަށް ލީޑު ނަގައިދީފަ އެވެ. މިއީ އެތްލެޓިކޯގެ އޭރިއާ ތެރޭ ހުރެ ފޮނުވާލި ބާރު ހަމަލާއަކުން ކާމިޔާބު ކުރި ގޯލެކެވެ.

Advertisement

ރެއާލުން ލީޑުނެގިތަނާ އެތުލެޓިކޯގެ ސަޕޯޓަރުން ވަނީ ރެއާލްގެ ގޯލްކީޕަރު ތިބޯ ކޯޓުއާ އަށް އަމާޒުކޮށް ދަނޑަށް އެއްޗެހި އުކަން ފަށާފަ އެވެ. އެއާއެކު މެޗު ވަގުތީ ގޮތުން މެދުކަނޑާލިއިރު މެޗު އަލުން ފެށީ އެތުލެޓިކޯގެ ކުޅުންތެރިންނާއި ކޯޗު ޑިއޭގޯ ސިމިއޯނީ ޓީމުގެ ސަޕޯޓަރުންނާއި ވާހަކަ ދައްކައިގެން ހާލަތު ހަމަޔަަށް އެޅުވުމަށްފަހު އެވެ.

އެތްލެޓިކޯ އިން ނަތީޖާ އެއްވަރުކުރީ މެޗުގެ އިތުރު ވަގުތުގެ ފަސް ވަނަ މިނިޓްގައި އެންހެލް ކޮރޭއާ ޖެހި ގޯލުންނެވެ. މި ގޯލު ފުރަތަމަ އޮފްސައިޑް ކަމަށް ނިންމި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ރެފްރީ ވަނީ އެއީ ރަނގަޅު ގޯލެއް ކަމަށް ކަނޑައަޅާފަ އެވެ.

މެޗުގެ ފަހު ވަގުތުކޮޅުތެރޭ ރެއާލްގެ ފްރާން ގާސިއާ އަށް ކުރި ނުރައްކާތެރި ފައުލަކާއި ގުޅިގެން އެތުލެޓިކޯގެ ލޮރެންޓޭ އަށް ދެއްކި ރަތްކާޑާއެކު އެޓީމުން މެޗު ނިންމާލީ 10 ކުޅުންތެރިންނާއެކު އެވެ.