މޯލްޑިވްސް ނެޝަނަލް ޕާޓީ (އެމްއެންޕީ)ގެ ޔޫތު ވިންގާއި މޯލްޑިވްސް ޔުނިފައިޑް ގޭމިންއާއި ގުޅިގެން ޕީއެސް ފީފާ މުބާރާތެއް ފަށައިފިއެވެ.

ރޭ ފެށި މި މުބާރާތަކީ 558 ބައިވެރިންނާއެކު ޑަބަލްސް ޓީމު ވާދަކުރާ ގޮތަށް ކުރިޔަށް ގެންދާ މުބާރާތެކެވެ.

މިމުބާރާތް ފެށުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ އެމްއެންޕީގެ ރައީސް ދަނގެތީ ދާއިރާގެ މެންބަރު ކާނަލް ރިޓަޔާޑް މުހައްމަދު ނާޒިމް ވަނީ އެ ޕާޓީއަކީ އަބަދުވެސް ޒުވާނުންނަށް ސަޕޯޓްކޮށް ޒުވާނުންނާއެކީ ވާ ޕާޓީ އެއްކަމަށް ވިދާޅުވެފައެވެ.

Advertisement

އެމްއެންޕީގެ ހުރިހާ ޖަގަހަ ތަކަކީ ޒުވާނުންނަށްޓަކައި ފަންނީ ހަރަކާތްތައް ހިންގުމަށް ހުރިހާ ވަގުތެއްގައި ވެސް ބޭނުން ކުރުމަށް ހުޅުވިފައި ހުންނާނެ ތަންތަންކަމަށާއި ކުރިޔަށް އޮތްތަނުގައި މިކަހަލަ އިތުރު މުބާރާތްތައް ބާއްވަވާނެ ކަމުގެ ޔަގީންކަން ވެސް ނާޒިމް ވަނީ ދެއްވާފައެވެ.

އޭޕްރިލް 6 އިން 11 ވަނަ ދުވަހުގެ ނިޔަލަށް ކުރިއަށް ގެންދާ މުބާރާތް ކުރިއަށް ދަނީ ރޭގަނޑު 9.30 އިން މެންދަމު 12.00 އަށް އެމްއެންޕީ މައި އޮފީހުގެ ޖަހަގަހައިގައެވެ.​

މި މުބާރާތުގެ އެއްވަނަހޯދާ ފަރާތަކަށް 8000 ރުފިޔާ ދެވަނައަށް 5000 ރުފިޔާ އަދި ތިންވަނައަށް 3000 ރުފިޔާ ދިނުމަށް ވަނީ ހަމަޖެހިފައެވެ.

މީގެ އިތުރުން ހަތަރުވަނަޔަށް 1000 ރުފިޔާ ދޭއިރު، ފަސްވަނައިން ފެށިގެން އަށްވަނައާއި ހަމައަށް ކޮންމެ ފަރާތަކަށް 500 ރުފިޔާ ދިނުމަށް ހަމަޖެހިފައިވެއެވެ.