އިހްސާންކަމުގައި، ގާތްތިމާގެ މީހުންނާ އޮންނަ ރަހިމުގެ ގުޅުން ދެމެހެއްޓުންވާކަމަށާއި އެއީ ޢުމުރާއި ރިޒްޤްގައި ބަރަކާތް ލައްވައި މަރުމަތި އަމާން ވާނެ ކަމެއްކަމަށް މިއަދުގެ ހުކުރު ޚުތުބާގައި ބުނެފިއެވެ.

މިއަދުގެ ހުކުރު ޚުތުބާގެ މައުޟޫއުއަކީ "އިހްސާންކަން" މިއެވެ.

ޚުތުބާގައި ބުނެފައިވާގޮތުން އިހްސާންކަމަކީ އިހްލާސްތެރިކަމާއި ތެދުވެރިކަމާއި ހެޔޮކޮށް ހިތުމެވެ.

އަދި އެއީ އިސްލާމްކަމާއި އީމާންކަމަށް ފަހު މުއުމިނެއްގެ ހަޔާތުގައި ނުހަނު މަތިވެރި ދަރަޖައެއް ލިބިގެންވާ ކަމެއްކަމަށް ޚުތުބާގައި ބުނެފައިވެއެވެ.

ވަހީގެ މަލާއިކަތާ ޖިބުރީލު އަލައިހިއްސަލާމް އިހްސާންކަމާއި ބެހޭގޮތުން ކީރިތި ރަސޫލާ ﷺ އާ ސުވާލު ކުރުމުން އެކަލޭގެފާނު ހަދީޘް ކުރެއްވި ބަސްފުޅުގެ މާނާގައިވެއެވެ.

"އިހްސާންކަމަކީ ތިބާ ﷲއަށް އަޅުކަންކުރާ ހިނދު ތިބާ އެކަލާނގެ ދެކެދެކެހުރެ އަޅުކަނކުރާ ފަދައިން އަޅުކަން ކުރުމެވެ. ފަހެ ތިބާއަށް އެކަލާނގެ ނުފެނުނުކަމުގައި ވިޔަސް އެކަލާނގެ ތިބާއަށް ބައްލަވައިވޮޑިގެންވާނެއެވެ."

ހުކުރު ޚުތުބާގައިވާގޮތުން އިހްސާންކަމުގެ އަނެއް މާނައަކީ ކަމޭހިތުމާއި އޯގާވެރިވުމާއި ހެޔޮކޮށް ހިތުމެވެ.

އަދި އިހްސާންކަމަކީ މުކައްލަފެއްގެ އެންމެހައި އަމަލުތަކުގައި ހުރުން ލާޒިމް ސިފައެއްކަމަށާއި އިސްލާމްކަމާއި އީމާންކަމާއި އަޅުކަމުގައިވެސް އެ ސިފަ ހުރުން ލާޒިމްކަމަށެވެ.

"އިޙްސާންކަމުގެ މަތިވެރި ސިފަ ލިބިގެންވާ މުއުމިނާ، އޭނާގެ އަޅުކަމުގައި މާތް ﷲއަށް އިޚްލާސްތެރިވާނެއެވެ. ނަމާދުގައި ދެއްކުންތެރިކަމެއް ނުހުންނާނެއެވެ. އަދި ޤިޔާމާއި ރުކޫއުއާއި ސުޖޫދުގައި މަޑުމައިތިރިވާނެއެވެ." ޙުލުބާގައި ބުނެފައިވެއެވެ.

"އިހްސާންކަމުގައި، ގާތްތިމާގެ މީހުންނާ އޮންނަ ރަހިމުގެ ގުޅުން ދެމެހެއްޓުން ވެއެވެ. އެއީ ޢުމުރާއި ރިޒްޤްގައި ބަރަކާތް ލައްވައި މަރުމަތި އަމާން ވާނެ ކަމެކެވެ. ރަހިމުގެ ގުޅުން ދެމެހެއްޓުމަކީ ސުވަރުގެ ވަނުމަށް މަގުފަހިވާ ކަމެކެވެ." ޚުތުބާގައި އިތުރަށް ބުނެފައިވެއެވެ.

ޚުތުބާގައި ބުނެފައިވަނީ ގާތްތިމާގެ މީހުން ފިޔަވައި ޔަތީމުންނާއި މިސްކީނުންނާއި ހަނގުރާމައިގެ އަސީރުން ފަދަ ނިކަމެތީންނަށް އެހީތެރިކަން ފޯރުކޮށްދީ ކާންދީ އުޅުމަކީ ވެސް އިހްސާންތެރިކަމުގެ ތެރޭގައި ހިމެނޭ މުހިއްމު ބައެއްކަމަށެވެ.