މި އަހަރުގެ ޖުލައި މަހުގެ ތެރޭގައި ހުޅުމާލޭގައި ބާރު ސްޕީޑްގައި ދުއްވި ސްޕޯޓްސް ކާރަކުން ޖެހި މީހަކަށް ބޮޑެތި އަނިޔާތަކެއް ލިބުނު މައްސަލާގައި ދައުވާކުރި އިބްރާހިމް އިކްރާމް ހުރިހާ ދައުވާތަކަށް އިއުތިރާފުވެއްޖެ އެވެ.

އޭނަ ބާރު ސްޕީޑްގައި ދުއްވި ސްޕޯޓްސް ކާރެު ކޮންޓްރޯލް ނުވެ ގޮސް، މަގުމަތީގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހި އެ މީހާއަށް ބޮޑެތި އަނިޔާތަކެއް ލިބުނެވެ. އެ މައްސަލާގައި ދައުވާކުރީ ކާރު ދުއްވި މ. ލޭންޑް އޮފް ގާޑެން އިކްރާމްގެ އިތުރުން އެ ހާދިސާ ހިނގި އިރު، ކާރުގައި ތިބި ހ. ނޫރަންމާގެއާގޭ އިކްރާމުއްރަހްމާނާއި ގއ. ކަނޑުހުޅުދޫ އާޒާދުގޭ ޖިނާހު އިސްމާއިލްގެ މައްޗަށެވެ.

މި މައްސަލާގައި މިއަދު ކްރިމިނަލް ކޯޓުގައި އޮތް އަޑުއެހުމުގައި ދައުލަތުން ވަނީ ތިން މީހުންގެ މައްޗަށް ވެސް ދައުވާ އިއްވައިފަ އެވެ.

ދައުވާތަކަށް ޖަވާބުދާރީވާން ފުރުސަތު ދިނުމުން އިކްރާމްގެ ވަކީލު ވިދާޅުވީ އޭނަ ދައުވާތަކަށް އިއުތިރާފުވެ، ދައުލަތާ އެކު އިއުތިރާފު އެއްބަސްވުމެއް ހަދަން ބޭނުންވާ ކަމަށެވެ. އެހެންވެ އެކަން ހުށަހަޅާފައިވާނެ ކަމަށް ވިދާޅުވި އެވެ.

އެކަމާ ގުޅިގެން ދައުލަތުގެ ވަކީލު ވެސް ވިދާޅުވީ އިކްރާމްގެ އެ ހުށަހެޅުން ލިބިފައިވާ ކަމަށާއި އެއްބަސްވުމެއް ހެދުމާ މެދު ގޮތެއް ނިންމުމުގެ މަސައްކަތް ކުރިއަށްދާ ކަމަށެވެ. އެއްބަސްވުން ހަދައި ނިމެންދެން ޝަރީއަތުގައި ދައުވާތަކަށް ޖަވާބުދާރީނު ވެ މަޑުކުރަން އިކްރާމްގެ ވަކީލް އެދުނު ނަމަވެސް، މައްސަލަ ބައްލަވާ ގާޒީ އަލީ ނަދީމް އެންގެވީ މިއަދުގެ އަޑުއެހުމުގައި ދައުވާތަކަށް ޝަރީއަތުގައި ވެސް ޖަވާބުދާރީވުމަށެވެ.

އެ އެންގެވުމާ ގުޅިގެން ވަކީލް ވިދާޅުވީ އިކްރާމްގެ މައްޗަށް ކުރާ ހަ ދައުވާ އަށް ވެސް އޭނަ އިއުތިރާފުވާ ކަމަށެވެ.

އެކްސިޑެންޓާ ގުޅިގެން ޖިނާހާއި އިކްރާމުއްރަހްމާން ވަނީ އެ މީހުން މައްޗަށް އުފުލާފައިވާ ދައުވާތަކަށް މިއަދުގެ އަޑުއެހުމުގައި އިންކާރުކޮށްފަ އެވެ.

އެ މީހުން ދައުވާތަކަށް އިންކާރު ކުރުމުން ދައުލަތުން އެމީހުންނާ ދެކޮޅަށް ހެކި ވެސް ހާމަކޮށްފައިވެ އެވެ.

އެކްސިޑެންޓްގައި އަނިޔާވި މީހާ ފަރުވާއަށް ރާއްޖޭން ބޭރަށް ދިޔުމަށް ހަރަދުވި 4،000 ރުފިޔާ އާއި ބޭސްފަރުވާއަށް ކުރަން ޖެހިފައިވާ ހަރަދު ތިން މީހުންގެ އަތުން ނަގައިދިނުމަށް ވެސް މި މައްސަލާގެ ތެރެއިން ދައުލަތުން މިއަދު އެދިފައިވެ އެވެ.