"ހަނގުރާމަ ހުއްޓުވާ" އަދި "އެމީހުން ދޮގުހަދާ" ލިޔެފައިވާ ޕްލެކާޑަކާއެކު ޚަބަރު ބްރޯޑްކާސްޓެއްގެ ތެރެއަށް ވަދެ ދުނިޔޭގެ ސަމާލުކަން ހޯދި ރަޝިޔާގެ ކުރީގެ ޓީވީ ނޫސްވެރިޔާ މެރީނާ އޮވްސިއަންނިކޯވާ އަށް ބުދަ ދުވަހު ޣައިރު ހާޒިރުގައި އަށް އަހަރާއި ބައިގެ ޖަލު ހުކުމެއް އިއްވައިފި އެވެ.

މުޒާހަރާގެ ސަބަބުން އޮވްސިއަންނިކޯވާ ފުރަތަމަ ޖޫރިމަނާކުރީ، 2022 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހު ރަޝިޔާއިން ޔޫކްރޭނަށް އަރައިގަތްތާ ތިން ހަފްތާ ވެސް ނުވަނީސް، "ޚާއްސަ އަސްކަރީ އޮޕަރޭޝަނެއް" ކަމަށް ބުނެ އެވެ.

އެކަމަކު ފަހުން ޖިނާއީ ދައުވާ އުފުލާފައި ވަނީ 2022 ވަނަ އަހަރުގެ ޖުލައި މަހު ކްރެމްލިންއާ ދިމާލުގައި ކޯރު ފަޅުތެރޭގައި ހުރެ ރައީސް ވްލަޑިމިއާ ޕޫޓިން އަކީ ގާތިލެއް ކަމަށާއި އޭނާގެ ސިފައިން ފެޝީސްޓުން ކަމަށް ބުނެ ޕޯސްޓަރެއް އުފުލާލި މުޒާހަރާއާ ގުޅިގެން "ރަޝިޔާގެ ސިފައިންނާ ބެހޭ ގޮތުން އެނގިހުރެ ދޮގު މައުލޫމާތު ފެތުރުމުގެ" މައްސަލައިގަ އެވެ.

Advertisement

"ތިކަން ހުއްޓާލުމުގެ ކުރިން އިތުރު ކިތައް ކުދިން މަރުވާން ޖެހޭނެ؟" އެ ޕޯސްޓަރުގައި ލިޔެފައިވެއެވެ.

އުމުރުން 45 އަހަރުގެ އޮވްސިއަންނިކޯވާ ގޭބަންދުން ސަލާމަތްވުމަށް ފަހު މީގެ އަހަރެއްހާ ދުވަސް ކުރިން އޭނާގެ އަންހެން ދަރިފުޅާއެކު ޔޫރަޕްގެ ގައުމަކަށް ފިލައިގެން ދިޔަ ކަމަށް އޭނާގެ ވަކީލު ވިދާޅުވި އެވެ.

ހުކުމް އިއްވުމުގެ ކުރިން ޓެލެގްރާމްގައި އޮވްސިއަންނިކޯވާ ނެރުނު ބަޔާނެއްގައި އޭނާ ވަނީ އެ ދައުވާއަކީ "މުޑުދާރު އަދި ސިޔާސީ ގޮތުން ކުރާ ދައުވާއެއް" ކަމަށް ބުނެފަ އެވެ.

"ހަމަ ޔަގީނުންވެސް އަހަރެންގެ ކުށަށް ގަބޫލެއް ނުކުރަން،" އޭނާ ލިޔެފައިވެ އެވެ. "އަދި އަހަރެން އެންމެ ބަހެއް ވެސް ފަހަތަށް ނުޖެހޭ."