އިންޑިއާގެ އިރުއުތުރުގައި އޮންނަ ހިމާލިޔާ ސަރަހައްދުގެ ކޯރެއްގެ ބިންގަނޑު ފަޅައިގެން ގޮސް ބޯކޮށް ވާރޭވެހި 14 މީހުން މަރުވެ 102 މީހަކު ގެއްލިފައިވާ ކަމަށް ކަމާބެހޭ އޮފިޝަލުން ބުނެފި އެވެ.

ސިކިމް ސްޓޭޓްގެ ލޮނަކް ކޯރުގެ އައްސޭރި ފަޅައިގެން ގޮސް ފެންބޮޑުވުމުގެ ސަބަބުން 22،000 މީހުންގެ ފުރާނައަށް އަސަރުކޮށްފައިވާ ކަމަށް ކަމާބެހޭ ފަރާތްތަކުން ބުނެ އެވެ.

"މި ސާޗް އޮޕަރޭޝަންތައް ކުރިއަށް ގެންދަނީ މެދުކެނޑުމެއްނެތި ވާރޭ ވެހުމާއި، ޓީސްޓާ ކޯރުގައި ބާރަށް ދައުރުވާ ފެނުގެ ސަބަބުން މަގުތަކާއި ބްރިޖުތައް އަދި އެތައް ތަނެއްގައި ހަލާކުވަމުންދާ ހާލަތްތަކެއްގައި،" ކަމަށް ދިފާއީ ތަރުޖަމާނަކު ވަނީ ވިދާޅުވެފައެވެ.

ބުރާސްފަތި ދުވަހުގެ ވަގުތާ ހަމައަށް ދައުލަތުގެ ޑިޒާސްޓާ މެނޭޖްމަންޓް އެޖެންސީން ބުނީ 26 މީހަކަށް އަނިޔާވެފައިވާއިރު 102 މީހަކު ގެއްލިފައިވާ ކަމަށާއި އޭގެ ތެރެއިން 22 މީހުންނަކީ ސިފައިންގެ މީހުން ކަމަށެވެ.

އޭއެންއައިގެ ނޫސް އެޖެންސީގެ ވީޑިއޯ ފޫޓޭޖުން ދައްކާ ގޮތުގައި ފެން ބޮޑުވެ އުސް ސަރަހައްދުތަކުގެ އެތައް ގެއެއް ވެއްޓި ސިފައިންގެ މަރުކަޒުތަކާއި އެހެނިހެން ވަސީލަތްތަކަށް ގެއްލުންވެފައެވެ.

ސެޓެލައިޓް ފޮޓޯތަކުން ދައްކާ ގޮތުގައި ކޯރުގެ ގާތްގަނޑަކަށް ދެބައިކުޅަ އެއްބައި ފެން ހިއްކާފައިވާ ކަމަށް ފެނެ އެވެ.

ކުރިއަށް އޮތް ދެ ދުވަހު ސިކިމްގެ ބައެއް ހިސާބުތަކަށާއި އަވަށްޓެރި ސްޓޭޓްތަކަށް އިތުރު ވާރޭ ވެހޭނެ ކަމަށް ލަފާކުރެވޭތީ ބިންހެލުމާއި ފްލައިޓްތަކަށް ބުރޫ އަރާނެ ކަމުގެ އިންޒާރު މޫސުމާ ބެހޭ އިދާރާއިން ވަނީ ދީފައެވެ.

ސިކިމްގެ ގާނޫނު ހަދާ މަޖިލީހުގެ މެމްބަރު ޖީ ޓީ ދުންގޭލް ރޮއިޓާސް އަށް ވިދާޅުވީ އެ ސްޓޭޓްގެ ވެރިރަށް ގޭންގްޓޮކްގައި ޕެޓްރޯލާއި ޑީސަލް މިހާރު ވެސް މަދުވި ނަމަވެސް ކާބޯތަކެތި ފަސޭހައިން ލިބެން ހުރި ކަމަށެވެ.

އިންޑިއާގެ އެހެން ފަރުބަދަމަތީ ސަރަހައްދުތަކުގެ އިތުރުން އަވަށްޓެރި ޕާކިސްތާނާއި ނޭޕާލްގެ ބައެއް ހިސާބުތަކުގައި ފާއިތުވި މަސްތަކުގައި ބޯކޮށް ވާރޭވެހި ފެންބޮޑުވުމާއި ބިންގަނޑު ކަނޑައިގެން ގޮސް އެތައް ބަޔަކު މަރުވެފައިވެ އެވެ.