ގެދޮރުވެރިޔާ ސްކީމުގެ ދަށުން ކުރީ ސަރުކާރުން ހުޅުމާލެއިން ދޫކުރަން ނިންމި 4000 ފްލެޓްގެ ދާއިމީ ލިސްޓް މި ހަފްތާ ނިމުމުގެ ކުރިން އިޢުލާން ކުރައްވާނެ ކަމަށް ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

ކުޑަހުވަދޫގެ ރައްޔިތުންނާ ބައްދަލުކުރެއްވުމަށް މިރޭ އެރަށުގައި ބޭއްވި ޖަލްސާގައި ރައީސް ވިދާޅުވީ ސަރުކާރުން އެންމެ ބޮޑު އިސްކަމެއް ދެނީ ކުރީ ސަރުކާރުން ފަށާފައިވާ ގެދޮރުވެރިކަމުގެ މަޝްރޫއުތައް މި ސަރުކާރުން ވެސް ކުރިއަށް ގެންގޮސް ނިންމުމާއެކު، އެމަނިކުފާނުގެ ރިޔާސީ ވައުދާ އެއްގޮތަށް ބޯހިޔާވަހިކަމުގެ މަޝްރޫއުތައް ފަށައިގެން ކުރިއަށް ގެންދިއުން ކަމަށެވެ.

އޭގެ އިތުރުން ގުޅީފަޅާއި ހުޅުމާލެ ފޭސް 3 އާއި ގިރާވަރުފަޅުން ގޯތިދިނުމަށް ކުރީ ސަރުކާރުން ހިންގި މަޝްރޫއު ކުރިއަށް ގެންދަވާނެ ކަމުގެ ޔަގީންކަން ރައީސް ވަނީ ދެއްވައިފަ އެވެ.

Advertisement

4000 ފްލެޓްތައް ހިމެނޭ މި ޓަވަރުތަކުގައި ހުންނާނީ 3 ކޮޓަރީގެ 2800 އެޕާޓްމެންޓާއި 2 ކޮޓަރީގެ 1200 އެޕާޓްމެންޓެވެ. 3 ކޮޓަރިއަކީ 900 އަކަފޫޓުގެ އެޕާޓްމަންޓްތަކެވެ. 2 ކޮޓަރި އަކީ 650 އަކަފޫޓުގެ އެޕާޓްމަންޓްތަކެވެ.

ކުރީ ސަރުކާރުގެ ދައުރު ނިމުމުގެ ކުރިން އެ ސަރުކާރުން ވަނީ ފްލެޓް ލިބުނު މީހުންގެ ފައިނަލް ލިސްޓެއް އާންމުކޮށްފަ އެވެ. ނަމަވެސް އެ ލިސްޓާ ގުޅޭ ގޮތުން މައްސަލަ ހުށަހެޅުމުން އެންޓި ކޮރަޕްޝަން ކޮމިޝަން (އޭސީސީ) އިން ވަނީ ލިސްޓުކޮށްފައިވާ މީހުންގެ ތެރެއިން ޝަރުތު ހަމަވަނީ އެންމެ 20 ޕަސެންޓް މީހުން ކަމަށް ބުނެފައެވެ.