ކުރިއަށް އޮތް ރަމަޟާން މަހުވެސް ކަރަންޓު ބިލުންނާއި ފެން ބިލުން ޑިސްކައުންޓް ދެއްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

ކުޑަހުވަދޫގެ ރައްޔިތުންނާ ބައްދަލުކުރެއްވުމަށް މިރޭ އެރަށުގައި ބޭއްވި ޖަލްސާގައި ރައީސް ވިދާޅުވީ, ސަރުކާރުން ރައްޔިތުންނަށް ޓަކައި ނިންމާ ނިންމުންތައް ތަންފީޒުކުރާތީ އެ ހަސަދައިގައި އިދިކޮޅު ފަރާތްތަކުން ދޮގު ވާހަކަތައް ފަތުރަމުންދާ ކަމަށެވެ. އެހެންކަމުން އެކަންކަމަށް ރައްޔިތުން ވަރަށް ބޮޑަށް ހޭލުންތެރިވެ ވިސްނަންޖެހޭ ކަމަށް ރައީސް ވިދާޅުވިއެެވެ.

އެގޮތުން މަސް ދަޅު ކޭސް ހަދިޔާކުރުމަށްފަހު އެކަމަށް ހިނގި ޚަރަދު ކަރަންޓު ބިލުތަކުން ނެގުމަށް ސަރުކާރުން ރާވާފައިވާކަމަށް ބުނެ ހަޤީގަތާއި ޚިލާފު ވާހަކަތައް ފަތުރަމުންދާކަމަށް ރައީސް ވިދާޅުވިއެވެ. ނަމަވެސް އެފަދަ ކަމެއް ސަރުކާރުން ނުކުރައްވާނެކަމަށާއި އޭގެ ބަދަލުގައި މިދިޔަ އަހަރެކޭ އެއްގޮތަށް މިއަހަރުވެސް ކަރަންޓު ބިލުންނާއި ފެން ބިލުން ޑިސްކައުންޓް ދެއްވާނެކަމަށް ރައީސް ވިދާޅުވިއެވެ.

Advertisement

ރައީސް ވިދާޅުވީ، މިދިޔަ އަހަރުގެ 8 ޑިސެމްބަރުގައި އއ. މަތިވެރިއަށް އެމަނިކުފާނު ކުރެއްވި ދަތުރުފުުޅުގައި ހުސްވި އަހަރުގެ ރޯދަ މަހުވެސް ކަރަންޓު ބިލުންނާއި ފެން ބިލުން ޑިސްކައުންޓް ދެއްވިގޮތަށް މިއަހަރުވެސް ކަރަންޓު ބިލުންނާއި ފެން ބިލުން ޑިސްކައުންޓް ދެއްވާނެ ކަމަށް ވިދާޅުވެފައިވާނެ ކަމަށާއި އެކަން އެގޮތަށް ކުރިއަށް ގެންދަވާނެކަމަށެވެ.