އެމެރިކާއިން ޔުކްރޭނަށް ދޭ އަސްކަރީ އެހީ މެދުކަނޑާލައިފި
ޔުކްރޭނަށް އަސްކަރީ އެހީތައް ދިނުން އެމެރިކާ އިން ވަގުތީ ގޮތުން މެދުކަނޑާލައިފި އެވެ.
ވައިޓްހައުސްގެ އޮފިޝަލަކާއި ހަވާލާދީ އެމެރިކާގެ ނޫސްތަކުން ރިޕޯޓުކޮށްފައިވާ ގޮތުގައި ޔުކްރޭނަށް އަސްކަރީ އެހީތައް ދިނުން މެދުކަނޑާލުމުގެ އިތުރުން އެގައުމަށް އެމެރިކާ އިން އަސްކަރީ ގޮތުން ދެމުންދާ އެހީތައް ރިވިއު ކުރުމަށް ނިންމާފައިވާ ކަމަށެވެ. މި ފިޔަވަޅުގެ ދަށުން ޔުކްރޭނަށް ފޮނުވުމުގެ މަގުމަތީގައިވާ ހުރިހާ ތަކެއްޗެއް އެގައުމާއި ހަމައަށް ގެންދިޔުން ވެސް މެދުކަނޑާލުން ހިމެނެ އެވެ.
އެމެރިކާގެ ރައީސް ޑޮނަލްޓް ޓްރަމްޕްގެ ފޯކަސް ހުރީ ރަޝިއާ-ޔުކްރޭން ހަނގުރާމަ ނިމުމަކަށް ގެނެސް ސުލްހަ ގާއިމުކުރުމަށް ކަމަށާއި ހުރިހާ ގައުމަކުން ވެސް މަސައްކަތް ކުރަންވީ އެ އަމާޒަށް ވާސިލުވުމަށް ކަމަށް އެމެރިކާ ސަރުކާރުން ދެކޭ ކަމަށްވެސް އޮފިޝަލް ވިދާޅުވި އެވެ.
ރިޕޯޓުތައް ބުނާގޮތުން އެމެރިކާ ސަރުކާރުގެ މި ފިޔަވަޅަކީ ހަނގުރާމަ ނިމުމަކަށް ގެންނަން ރަޝިއާއާއެކު އެއްބަސްވުމަކަށް އަންނަން ޔުކްރޭނަށް ޕްރެޝަރު ކުރުމެވެ.
ޔުކްރޭނަށް މިހާތަނަށް އެންމެ ބޮޑު އެހީތެރިކަމެއް ފޯރުކޮށްދިން ގައުމަކީ އެމެރިކާ އެވެ. އެގޮތުން ޖެނުއަރީ 2022 އިން ފެށިގެން މިދިޔަ އަހަރުގެ ޑިސެމްބަރުގެ ނިޔަލަށް އެމެރިކާ އިން ވަނީ 119.7 ބިލިއަން ޑޮލަރު އެހީގެ ގޮތުގައި ޔުކްރޭނަށް ދީފަ އެވެ.
އެމެރިކާގެ ރައީސް ޓްރަމްޕް، ދާދިފަހުން ޔުކްރޭނުގެ ރައީސް ވޮލޮޑިމިރް ޒެލެންސްކީއާ އެކު ބޭއްވި ބައްދަލުވުން ހޫނު ޒުވާބަކަށް ބަދަލުވެގެން ދިޔައިރު، އެ ބައްދަލުވުމަށްފަހު ޓްރަމްޕް ވަނީ ސުލްހަ ގާއިމުކުރަން ޒެލެންސްކީ ބޭނުން ނުވާ ކަމަށް ވިދާޅުވެފަ އެވެ. އަދި ސުލްހަ ގާއިމުކުރަން ބޭނުންވި އިރަކުން ޒެލެންސްކީ އަށް އަލުން އަނބުރާ އެމެރިކާ އަށް ވަޑައިގަތުމަށް ފުރުސަތު އޮންނާނެ ކަމަށްވެސް ޓްރަމްޕް ވިދާޅުވި އެވެ.