ނޫސްވެރިކަމާއި ޚިޔާލު ފާޅުކުރުމުގެ މިނިވަންކަމުގެ ހައްގުގެ ބޭނުން ނަހަމަ ގޮތުގައި ހިފައިގެން މުޖްތަމަޢު ފަސާދަކުރަން އުޅޭ ފަރާތްތަކާމެދު ގާނޫނީގޮތުން ފިޔަވަޅު އަޅަންޖެހޭކަމަށް ޖުމްހުރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.

މަޝްހޫރު ވިޔަފާރިވެރިޔާ، ގާސިމް މިގޮތަށް ވިދާޅުވެފައިވަނީ ރޯޔަލް އައިލެންޑު ރިޒޯޓުގައި، ސުޕްރީމް ކޯޓުގެ ފަނޑިޔާރުންނާ ދެކޮޅަށް ސިއްރު ރޭވުމެއް ރޭވިކަމަށް ބުނެ ދައުރުވަމުންދާ ވާހަކަ ތަކަކާއި ގުޅިގެންނެވެ.

ދިޔަވަރު”ގެ ނަމުގައި ހިންގަމުން އަންނަ އޮންލައިން ނޫހެއްގައިވަނީ، ރޯޔަލް އައިލެންޑުގައި އުއްތަމަ ފަނޑިޔާރު އަހްމަދު މުއުތުސިމް އަދުނާނާއި، މަޖިލިސް ނައިބު ރައީސް އަހްމަދު ނާޒިމް ސުޕްރީމް ކޯޓު ފަނޑިޔާރުންނާ ދެކޮޅަށް ސިއްރު ރޭވުމެއް ރޭވިކަމަށް ބުނެ ލިޔުމެއް ޝާއިއުކޮށްފައެވެ.

ގާސިމް ވިދާޅުވީ އެމަނިކުފާނުގެ ރިސޯޓެއްކަމުގައިވާ ރޯޔަލް އައިލެންޑްގައި ރާއްޖޭގެ އުއްތަމަ ފަނޑިޔާރާއި މަޖިލީސް ނާއިބު ރައީސް އަޙްމަދު ނާޒިމް ބައްދަލުކުރައްވައި، “ސުޕްރީމް ކޯޓު ފަނޑިޔާރުންނާއި ދެކޮޅަށް ރޭވި ސިއްރު ރޭވުން ނަމުގައި” ނަމުގައި އޮންލައިން ނޫހެއްގައި ލިޔެފައިވާ ލިޔުމަކީ އެއްވެސް ހަޤީޤަތެއް ނެތް ވާހަކަތަކެއްކަމަށެވެ. އަދި އެ ފަދަ ލިޔުންތައް ލިޔެ ޝާއިއުކުރާ މީހުންނަކީ ދޮގު ޚަބަރު ފެތުރުމުގައި ހުރި ނުބައިކަމާއި، ފާފަވެރިކަން އެނގިތިބެ، މުޖުތަމަޢު ފަސާދަ ކުރުމުގެ ބޭނުމުގައި ތަކުރާރު ކޮށް އެފަދަ އަމަލުތައް ހިންގާ މީހުންކަމަށް ގާސިމް ވިދާޅުވިއެވެ.

އެލިޔުމުގައި ވަނީ ގާސިމް ނުހިމަނައި ކުރިޔަށް ގެންދިޔަ އެ ބައްދަލުވުމުގައި، ރައީސް ޑރ. މުހައްމަދު މުއިއްޒާ “އެއްކޮޅަށް އެރުމަށް” ދެކޮޅު ހެދި ސުޕްރީމް ކޯޓުގެ ފަނޑިޔާރުންނާ ދެކޮޅަށް ކުރެވެން ހުރި ކަންކަމާ ގުޅޭ ގޮތުން މަޝްވަރާ ކުރެއްވި ކަމަށެވެ.

މި ތުހުމަތުތައް ދޮގުކުރައްވަމުން ގާސިމް އެކްސްގައި ވިދާޅުވީ، އެމަނިކުފާނާއި އަދި ސިޔާސީ ބޭފުޅުންތަކެއް ރޯޔަލް އައިލެންޑްގައި ބައްދަލުކުރިކަމަށް ބުނެ ވާހަކަ ފަތުރަމުން ދާއިރު، އެމަނިކުފާނު ރޯޔަލް އައިލެންޑަށް ވަޑައިނުގަންނަވާތާ 3 އަހަރުވެއްޖެކަމަށެވެ. އަދި އުއްތަމަ ފަނޑިޔާރާއި ޝިހާބު ވެސް، އެ ރިޒޯޓަށް މި އަހަރުގެ ތެރޭގައި އެއްވެސް ބޭނުމަކު ވަޑައިގެންފައިނުވާ ކަމަށް ގާސިމް ވަނީ ވިދާޅުވެފައެވެ.

ގާސިމް ވިދާޅުވީ އެމަނިކުފާނާއި ސިޔާސީ ބައެއް ބޭފުޅުންނާއި ގުޅުވައިގެން ރައްޔިތުންގެ މެދުގައި ފިތުނަ އުފެދޭ ގޮތަށް އެއްވެސް ހަޤީޤަތެއް ނެތި ސިޔާސީ ބޭނުމުގައި ވަކި ބަޔަކު އޮންލައިން ނޫސްތަކުގައި ފަތުރާ އަދި ފަތުރަމުން ދާ މިފަދަ ދޮގު ވާހަކަތައް ހުއްޓުވައި ދިނުމަށް ކަމާބެހޭ ފަރާތްތަކަށް ގޮވާލާކަމަށެވެ.

އަދި މިފަދަ ލިޔުންތައް ލިޔެ ޝާއިއުކުރާ މީހުންނަކީ މިފަދަ ދޮގު ޚަބަރު ފެތުރުމުގައި ހުރި ނުބައިކަމާއި، ފާފަވެރިކަން އެނގިތިބެ، މުޖުތަމައު ފަސާދަ ކުރުމުގެ ބޭނުމުގައި މިފަދަ އަމަލުތަައް ތަކުރާރުކޮށް ކުރާ މީހުން ކަމަށެވެ.

“ނޫސްވެރިކަމާއި ޚިޔާލު ފާޅުކުރުމުގެ މިނިވަން ކަމަކީ، ހަޤީޤަތެއް ނެތް ދޮގުވާހަކަ ފަތުރާ ސިޔާސީ މަޤްޞަދުތައް ހާސިލް ކުރުމުގެ ބޭނުމުގައި މުޖުތަމަޢު ފަސާދަ ކުރުމަށްއޮތް ލައިސަންސެއް ކަމަށް ދެކި، މިފަދަ ޢަމަލު ތައް ތަކުރާރު ކުރާފަރާތްތަކަށް ޤާނޫނީ ފިޔަވަޅު އެޅިގެން ނޫނީ މިފަދަ ކަންކަން ހުއްޓުމަކަށް ނާންނާނެއެވެ” ގާސިމް ވިދާޅުވިއެވެ.