އަފްޣާނިސްތާނުގެ ހުޅަނގުގައިވާ ސަރަޙައްދަކަށް އައި ބާރުގަދަ ބިންހެލުންތަކެއްގައި، 320 އަށްވުރެ ގިނަ މީހުން މަރުވެއްޖެއެވެ. ހަރާތު ޕުރޮވިންސަށް ދެ ބިންހެލުމެއް އައިސްފައިވާއިރު، އެ ހެލުންތައް ރެކޯޑު ކުރެވިފައި ވަނީ ރިކްޓަރ މިންގަނޑުން 6.3ގައެވެ. ދެވަނަ ބިންހެލުން އައިސްފައި ވަނީ ފުރަތަމަ ހެލުމަށް ވުރެ 10 ވަރަކަށް މިނެޓު ފަހުންނެވެ. ބިންހެލުންތަކާ އެކު ހަރާތު ޕުރޮވިންސުގެ 12 ވަރަކަށް އަވަށް މުޅިން ސުންނާފަތިވެފައިވާ ކަމުގައި ރިޕޯޓުތައް ބުނެއެވެ.

އެންމެ ބޮޑަށް ގެއްލުން ލިބިފައި ވަނީ ހަރާތު ސިޓީއަށެވެ. ހަރާތު ޕުރޮވިންސުގެ އިސް އޮފިޝަލުން ބުނީ، ބިންހެލުމުގައި ވެއްޓުނު ޢިމާރާތްތަކުގެ ދަށުވެ، 600 އަށްވުރެ ގިނަ މީހުން ޒަޚަމުވެފައިވާ ކަމުގައެވެ. އެ ސަރަޙައްދުގައި އޮންނަ ރީޖަނަލް ހޮސްޕިޓަލުން ބުނީ، ބިންހެލުމުގައި މަރުވި މީހުންނާއި، ޒަޚަމުވި މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައެވެ.

ބިންހެލުން އައިސްފައި ވަނީ ހަރާތު ސިޓީއާ 40 ކިލޯމީޓަރު ހުޅަނގުއުތުރުން އޮންނަ ސަރަޙައްދަކަށް ކަމުގައި ބިންހެލުންތައް ދިރާސާކުރާ އެމެރިކާގެ ޔޫ.އެސް ޖިޔޮލޮޖިކަލް ސަރވޭ (ޔޫ.އެސް.ޖީ.އެސް)އިން ބުނެއެވެ. އެއީ، އީރާނުގެ ސަރަޙައްދީ ރޮނގު ކައިރީގައި އޮންނަ ހިސާބެކެވެ. ބިންހެލުމަށް ފަހު އިތުރު ހަތް ލޮޅުން އެ ސަރަޙައްދަށް އައިސްފައިވާ ކަމުގައި ވެސް ޔޫ.އެސް.ޖީ.އެސްއިން ބުނެއެވެ.

Advertisement

ބިންހެލުމާ ގުޅިގެން އަފްޣާނިސްތާނުގައި ވެރިކަންކުރާ ޠާލިބާނުންގެ ސަރުކާރުން ވަނީ އެ ޤައުމުގެ ހުޅަނގުގައިވާ ސަރަޙައްދުތަކުގައި ކުއްލި ހާލަތު އިޢުލާނު ކޮށްފައެވެ. ހަރާތު ޕުރޮވިންސުގެ ކުއްލި ހާލަތްތަކާ ބެހޭ އިދާރާގެ އިސް އޮފިޝަލެއް ކަމުގައިވާ މޫސާ އަޝަރީ ބުނީ، ބިންހެލުން އައިސްފައިވާ ސަރަޙައްދަށް އިތުރު ލޮޅުންތައް އަންނާނެ ކަމަށް ބެލެވޭ ކަމުގައެވެ.

ބިންހެލުމުގައި ހަރާތު ޕުރޮވިންސުގެ ޒިންދާ ޖާން ޑިސްޓްރިކްޓުގެ 12 އަށްވުރެ ގިނަ އަވަށް ސުންނާފަތިވެފައިވާއިރު، ވެއްޓިފައިވާ ގެދޮރާއި ޢިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުން ސަލާމަތް ކުރަން އޮފިޝަލުން ދަނީ މަސައްކަތް ކުރަމުންނެވެ.

އަފްޣާނިސްތާނުގައި ހަރަކާތްތެރިވާ ބައިނަލްއަޤުވާމީ ޖަމުޢިއްޔާތަކުން ވެސް ދަނީ، ބިންހެލުމުގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދޭން މަސައްކަތް ކުރަމުންނެވެ. މި ގޮތުން، ދުނިޔޭގެ ޞިއްޙަތު ޖަމުޢިއްޔާ—ވޯލްޑް ހެލްތް އޮގަނައިޒޭޝަން (ޑަބްލިޔު.އެޗް.އޯ)އިން ދަނީ ބިންހެލުން އައި ސަރަޙައްދަށް އެމްބިޔުލާންސްތައް ފޮނުވަން މަސައްކަތް ކުރަމުންނެވެ.

ފާއިތުވި އަހަރުތަކުގެ ތެރޭގައި އަފްޣާނިސްތާނަށް ގިނަ ޢަދަދެއްގެ ޤުދުރަތީ ކާރިސާތަކާ ކުރިމަތިވެފައިވާ ކަން ފާހަގަ ކުރެވެއެވެ. އޭގެ ތެރޭގައި ބިންހެލުންތަކާއި، މެދުކެނޑުމެއް ނެތި ބޯކޮށް ވާރޭވެހުމާއި، ފެންބޮޑުވުމުގެ ހާދިސާތައް ހިމެނެއެވެ. ހުސްވި އަހަރުގެ ޖޫން މަހު ވެސް އެ ޤައުމުގެ އިރުދެކުނުގައިވާ ސަރަޙައްދުތަކަށް ބާރުގަދަ ބިންހެލުމެއް އައިސް، 1,000 އަށްވުރެ ގިނަ މީހުން މަރުވިއެވެ. އަދި، 1,600 އަށްވުރެ ގިނަ މީހުން ޒަޚަމުވިއެވެ.

ޠާލިބާނުން އަފްޣާނިސްތާނުގެ އިންތިޚާބީ ސަރުކާރު ވައްޓައިލާ އެ ޤައުމުގެ ވެރިކަން ފޭރިގަނެފައި ވަނީ 2021 ވަނަ އަހަރުގެ އޮގަސްޓު މަހުއެވެ. މި ފަދަ ޤުދުރަތީ ކާރިސާތަކުގައި ހާލުގައި ޖެހޭ މީހުންނަށް އެންމެ ފުރިހަމައަށް އެހީތެރިކަން ފޯރުކޮށްދޭން ޠާލިބާނުން ވަނީ ނުކުޅެދިފައެވެ.