ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތް—ޙިޒްބުﷲއިން ޔަހޫދީ އިސްރާޢީލުގެ އަމާޒުތަކަށް ހަމަލަދޭން ފަށައިފިއެވެ. ޙިޒްބުﷲއިން ޔަހޫދީ އިސްރާޢީލަށް ހަމަލަދޭން ފަށާފައި މި ވަނީ، ފަލަސްޠީނުގެ މިނިވަން ކަމަށް ޖިހާދު ކުރަމުންދާ ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް ހަނގުރާމަ އިޢުލާނުކޮށް 'އޮޕަރޭޝަން އަޤްޞާ ފްލަޑް'ގެ ނަމުގައި ފަށާފައިވާ ޚާއްޞަ އަސްކަރީ ކެމްޕޭންގައި ބައިވެރިވުމުގެ ގޮތުންނެވެ.

ޙިޒްބުﷲއިން ބުނީ، ޔަހޫދީން އަތްގަދަކޮށްފައިވާ ލުބުނާނުގެ ބިންތަކެއް ކަމުގައިވާ ޝަބްޢާގެ ދަނޑުބިންތަކުގައި ޔަހޫދީ އިސްރާޢީލުން ގާއިމުކޮށްފައިވާ ރާޑަރު ސިސްޓަމްތަކަށް ވަރުގަދަ ހަމަލަތަކެއް ދީފައިވާނެ ކަމުގައެވެ. މީގެ އިތުރުން ޒަބްދީނާއި ރުވައިސަތް އަލް-ޢަލްމީގައި ޔަހޫދީ އަސްކަރިއްޔާއިން ގާއިމުކޮށްފައިވާ މަރުކަޒުތަކަށް ވެސް ޙިޒްބުﷲއިން ވަނީ އާޓިލަރީ ބަޑިއާއި 'ގައިޑެޑް މިސައިލް' ބޭނުންކޮށްގެން ހަމަލަތަކެއް ދީފައެވެ.

ޙަމާސްއިން ބުނީ، ޔަހޫދީ އިސްރާޢީލާ ދެކޮޅަށް ހަނގުރާމަ އިޢުލާނު ކުރަން މަޖުބޫރުވީ، ޔަހޫދީ ޖައްބާރު ސިފައިންގެ އަމަލުތަކަށް ކެތް ނުކުރެވިގެން ކަމުގައެވެ. މުސްލިމުންގެ ތިންވަނައަށް އެންމެ މުޤައްދަޞް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކަނޑަމުންދާތީ ކަމުގައެވެ. ޔަހޫދީންގެ ޢާންމުންނާއި ޔަހޫދީ ޖައްބާރު އަސްކަރިއްޔާގެ ސިފައިން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެން ކަމުގައެވެ. ފަލަސްޠީނުގެ ކުށެއް ނެތް ޢާންމު ރައްޔިތުންގެ ލޭއޮހޮރުވައިލަމުންދާ މަންޒަރު ބަލަން ތިބެވެން ނެތުމުން ކަމުގައެވެ.

ލުބުނާނުގައި ޔަހޫދީ އިސްރާޢީލުން ގާއިމުކޮށްފައިވާ އަސްކަރީ މަރުކަޒުތަކަށް ޙިޒްބުﷲއިން ހަމަލަ ދޭން ފަށާފައި މި ވަނީ، 'އޮޕަރޭޝަން އަޤްޞާ ފްލަޑް'ގައި ބައިވެރިވުމަށް ޙަމާސްއިން އެ ޖަމާޢަތަށް ގޮވައިލުމާ ގުޅިގެން، އެ ގޮވައިލުމަށް އިޖާބަދިނުމުގެ ގޮތުންނެވެ. ޝަބްޢާގެ ދަނޑުބިންތަކުގައިވާ ޔަހޫދީ އަސްކަރިއްޔާގެ އަމާޒުތަކަށް ދީފައިވާ ހަމަލަތަކުގެ ޒިންމާ އުފުލާ ކަމަށް ޙިޒްބުﷲއިން ވަނީ ބުނެފައެވެ.

ޙިޒްބުﷲއިން ދިން ހަމަލަތަކަށް ރައްދު ދިނުމުގެ ގޮތުން ޔަހޫދީ އިސްރާޢީލުން ވެސް ވަނީ ލުބުނާނަށް ހަމަލަދޭން ފަށާފައެވެ. މި ހަމަލަތައް އަމާޒުކޮށްފައި ވަނީ ޙިޒްބުﷲގެ އަސްކަރީ އަމާޒުތަކަށް ކަމުގައި ޔަހޫދީ އިސްރާޢީލުން ބުނެއެވެ. އަދި، ލުބުނާނުގެ ސަރަޙައްދީ ރޮނގު ކައިރީގައި ދޯފް ފަރުބަދަ އޮންނަ ސަރަޙައްދުގައި ޙިޒްބުﷲއިން ގާއިމުކޮށްފައިވާ ޗެކް ޕޯސްޓަކަށް އާޓިލަރީ ބަޑީގެ ހަމަލަތަކެއް ދީފައިވާނެ ކަމުގައި ޔަހޫދީ އިސްރާޢީލުގެ ޖައްބާރު އަސްކަރިއްޔާއިން ބުނެއެވެ. މި ހަމަލަތަކުގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ.

މަސްރަޙު ދިރާސާ ކުރާ ފަރާތްތަކުން ބުނީ، ޙަމާސްގެ އަސްކަރީ އޮޕަރޭޝަންގައި ޙިޒްބުﷲއިން ބައިވެރިވުމުން، ޙަމާސްއާއި ޔަހޫދީ އިސްރާޢީލާ ދެމެދު ފަށާފައިވާ ހަނގުރާމަ އިތުރަށް ހޫނުވާނެ ކަމަށް ބެލެވޭ ކަމުގައެވެ. ޙިޒްބުﷲގެ ފުރަތަމަ ހަމަލަތައް އަމާޒުކޮށްފައި ވަނީ ޝަބްޢާގެ ދަނޑުބިންތަކުގައިވާ ޔަހޫދީ އަސްކަރިއްޔާގެ އަމާޒުތަކަށް ނަމަވެސް، އެ ޖަމާޢަތަކީ ސަރަޙައްދީ ރޮނގު ހުރަސްކޮށް އިސްރާޢީލުގެ އުތުރުގައިވާ ރަށްތަކަށް ހަމަލަދިނުމުގެ ގާބިލުކަން ލިބިފައިވާ ޖަމާޢަތެކެވެ. އަދި، ކުރިއަށް އޮތް ދުވަސްތަކުގެ ތެރޭގައި އެ ޖަމާޢަތުގެ ހަމަލަތައް އިސްރާޢީލުގެ ރަށްތަކަށް އަމާޒުކުރާނެ ކަމަށް ބެލެވޭ ކަމުގައި ވެސް މަސްރަޙު ދިރާސާ ކުރާ ފަރާތްތަކުން ބުނެއެވެ.

ޔަހޫދީ އިސްރާޢީލުގެ ނޫހެއް ކަމުގައިވާ ހައާރެތްޒުން ބުނީ، ޙަމާސްގެ އަސްކަރީ އޮޕަރޭޝަނުގައި ޙިޒްބުﷲއިން ބައިވެރިވުމަކީ އިސްރާޢީލަށް އޮތް ބޮޑު ނުރައްކަލެއް ކަމުގައެވެ. ސަބަބަކީ، އިސްރާޢީލުގެ އުތުރާއި ދެކުނުން އެ ޤައުމުގެ އަސްކަރިއްޔާއަށް ހަނގުރާމަ ކުރަން ޖެހުމެވެ. މިއީ، އިސްރާޢީލަށް މީގެ ކުރިން ކުރިމަތިލާން ޖެހިފައިވާ ހާލަތެއް ނޫން ކަމުގައި ވެސް އެ ނޫހުގައި ރިޕޯޓުކޮށްފައިވެއެވެ.

އޮޕަރޭޝަން އަޤްޞާ ފްލަޑްގެ ދަށުން ޙަމާސްގެ މުޖާހިދުން ވަނީ އިސްރާޢީލުގެ ރަށްތަކަށް އަރައި، ގިނަ ޢަދަދެއްގެ ޔަހޫދީން ހައްޔަރު ކޮށްފައެވެ. އޭގެ ތެރޭގައި ޔަހޫދީ ފުލުހުންނާއި ސިފައިންގެ އިތުރުން ގިނަ ޢަދަދެއްގެ ޢާންމުން ވެސް ހިމެނެއެވެ. ސިފައިނާއިންނާއި ފުލުހުންގެ އިސް ކޮމާންޑަރުން ވެސް ހިމެނެއެވެ. ޙަމާސްގެ މުޖާހިދުންނާއި ޔަހޫދީ ސިފައިންނާ ދެމެދު ހިނގި ކުރިމަތިލުންތަކުގައި މިހާތަނަށް ޔަހޫދީންގެ 250 އަށްވުރެ ގިނަ މީހުން މަރައިލާފައިވާ ކަމަށް ރިޕޯޓުތައް ބުނެއެވެ.

ޙަމާސްއަށް ބަދަލު ހިފުމުގެ ގޮތުން ޔަހޫދީ އަސްކަރިއްޔާއިން ވަނީ ޣައްޒާއަށް ބޮން އަޅަން ފަށާފައެވެ. އަދި، ޑްރޯނާއި އާޓިލަރީ ބަޑި ބޭނުން ކޮށްގެން ހަމަލަދޭން ފަށާފައެވެ. މި ހަމަލަތަކުގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު ވަނީ 256 އަށް އަރާފައެވެ. އަދި، އެތަކެއް ސަތޭކަ ބަޔަކު ވަނީ ޒަޚަމު ކޮށްލާފައެވެ. އަދި، އަސްކަރީ ޓޭންކުފަހަރު ފަދަ ބަރުހަތިޔާރާ އެކު ޣައްޒާއަށް އަރަން ތައްޔާރުވަމުންދާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ޔަހޫދީންގެ ހަމަލަތަކުގައި ޒަޚަމު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު 1,799 އަށް އަރައެވެ.