ހައްދުފަހަނަ އަޅާފައިވާ ޔަހޫދީ އިސްރާއީލުން ދިން ހަމަލާ އެއްގައި ފަލަސްތީނިއަން އިސްލާމިކް ޖިހާދު (ޕީއައިޖޭ)ގެ ތަރުޖަމާނު، އަބޫ ހަމްޒާ ޝަހީދު ކޮށްލައިފި އެވެ.

ޣައްޒާގެ ޚަބަރު ފަތުރާ ބައެއް މަސްދަރު ތަކުން ރިޕޯޓް ކޮށްފައިވާ ގޮތުގައި ނާޖީ އަބޫ ސައިފް (އަބޫ ހަމްޒާ) ޝަހީދުކޮށްލާފައިވަނީ  އޭނާގެ އަންހެނުން ޝައިމާ އަބޫ ސެއިފް އާއި ބޭބެ ޣައްސާން މާހިރު އަބޫ ސެއިފް އަދި އޭނާގެ ކޮއްކޮ ސާރާ އަބޫ ސެއިފް އަދި އެމީހުންގެ ދަރިންނާ އެކު ޣައްޒާގެ މެދުތެރޭގައި ހުންނަ އޭނާގެ ގެއަށް އަމާޒުކޮށް ޔަހޫދީން ރޭ ދިން ވަރުގަދަ ހަމަލާތަކުގައި އެވެ.

ޔަހޫދީން ދިން ހަމަލާތަކުގައި އަބޫ ހަމްޒާ އާއި އޭނާގެ އާއިލާ ޝަހީދު ވުމުން ފަލަސްތީނިއަން އިސްލާމިކް ޖިހާދު ނެރުނު ބަޔާނެއްގައި ބުނީ "އަބޫ ހަމްޒާ ޝަހީދު ކޮށްލުމުން ދެކޮޅުވެރިކަން ބަލިކަށި ނުވާނެ ކަމަށާއި އޭގެ ބަދަލުގައި އިސްރާއީލުގެ އަނިޔާވެރިކަމާ ކުރިމަތިލުން ކުރިއަށް ގެންދިއުމުގެ އަޒުމް ވަރުގަދަވާނެ. ބިން މިނިވަންވެ، ރައްޔިތުންގެ ހައްގުތައް އަނބުރާ ލިބެންދެން ޝަހީދުންގެ ލޭގެ ސަބަބުން ދެކޮޅުވެރިކަމަށް ތެޔޮ ޖަހާނެ." ކަމަށެވެ. 

Advertisement

މީގެ އިތުރުން އެ ޖަމާއަތުން ނެރުނު ބަޔާނުގައި ބުނީ މި ހަމަލާގެ ސަބަބުން "މި އަނިޔާވެރިކަމުގެ އަމާޒުތައް މުޅިން ނާކާމިޔާބު ވާންދެން އަޅުގަނޑުމެންގެ ރައްޔިތުންނާއި އެމީހުންގެ ހައްގުތައް ދިފާއުކުރުމުގައި ދެމިތިބުމަށް އަޅުގަނޑުމެންގެ އަޒުމް ވަރުގަދަވެގެންދާނެ" ކަމަށެވެ.