ސުޕްރީމް ކޯޓުގެ ފަނޑިޔާރު އަލީ ރަޝީދު ހުސެއިން ޝަރީއަތުގެ އަޑުއެހުމެއް އޮތް ގަޑީގައި ވަޒީފާގެ މަސްއޫލިއްޔަތު ދޫކޮށް “ޓެކްސީ ޑްރައިވަރެއްގެ” ގޮތުގައި އެއާޕޯޓަށް މީހުން އުފުލަން އުޅުނު ކަމަށް ބުނެ ޖުޑީޝަލް ސާވިސް ކޮމިޝަން (ޖޭއެސްސީ)އަށް އަމިއްލަ ފަރާތަކުން ހުށަހެޅި މައްސަލަ ނުބަލަން އެ ކޮމިޝަނުން ނިންމައިފިއެވެ.

އަމިއްލަ ފަރާތަކުން ހުށަހެޅި މި މައްސަލައިގައި ބުނެފައިވަނީ ރައްޔިތުންގެ މަޖިލީހުގެ މެންބަރުންނާ ގުޅޭ ގޮތުން ގާނޫނުއަސާސީއަށް ގެނައި އިސްލާހު ބާތިލު ކުރަން ހުށަހެޅި މައްސަލައިގެ ޝަރީއަތުގެ އަޑުއެހުމަށް ފަނޑިޔާރު އަލީ ރަޝީދު ގަސްދުގައި ނުގޮސް ކޯޓުން ބޭރުގައި ޓެކްސީ ކުރުމަށް އުޅުނުކަމަށެވެ. އަދި އަޑުއެހުމަށް ހާޒިރުވުން ލަސްވާނެކަން ކުރިއާލައި އަންގާފައި ނުވާކަން ފާހަގަކޮށް މި މައްސަލަ ހުށަހެޅި ފަރާތުން ވަނީ އެ ދުވަހުގެ އަޑުއެހުމަށް އަލީ ރަޝީދު ހާޒިރުވީ ސުޕްރީމް ކޯޓުގެ ތިން ފަނޑިޔާރުން ކަމަށްވާ ހުސްނުއްސުއޫދު، މަހާޒު އަލީ ޒާހިރު އަދި ޑރ. އަޒްމިރަލްދާ ޒާހިރު ސަސްޕެންޑްކުރި ކަމުގެ ސިޓީ ކޯޓަށް ލިބުމުން ކަމަށެވެ.

މި ސަބަަބަށް ރިއާޔަތްކޮށް މައްސަލަ ހުށަހެޅި ފަރާތުން ވަނީ އަލީ ރަޝީދު އަމަލުކޮށްފައިވަނީ ފަނޑިޔާރުންގެ ސުލޫކާ ހިލާފަށް ކަމަށް ބުނެ މައްސަލަ ބަލައިދިނުމަށް ޖޭއެސްސީގައި އެދިފައެވެ. މި މައްސަލައާއި ގުޅޭ ގޮތުން ޖޭއެސްސީގައި މަޝްވަރާކޮށް، މި މައްސަލަ ކުރިއަށް ނުގެންދަން ނިންމާފައިވާއިރު މިހާރުވެސް ދެ ފަނޑިޔާރެއްގެ މައްސަލަ ޖޭއެސްސީއިން އަންނަނީ ބަލަމުންނެވެ.

Advertisement