އިސްރާއީލާއި ފަލަސްތީނުގެ ހަމަނުޖެހުން އިތުރަށް ގޯސްވުން ހުއްޓުވުމަށް އަވަސް އަދި ފައިދާހުރި ފިޔަވަޅުތަކެއް އެޅުމަށް ލީގު އޮފް އަރަބް ސްޓޭޓްސްގެ ޚާރިޖީ ވަޒީރުން ބައިނަލްއަގްވާމީ މުޖުތަމަޢަށް އިލްތިމާސްކޮށްފިއެވެ.

މިނިސްޓަރުން ވަނީ ބުދަ ދުވަހު ޤާހިރާގައި ކުއްލި ބައްދަލުވުމެއް ބާއްވާފައެވެ.

ލީގުގެ ސެކްރެޓަރީ ޖެނެރަލް އަހުމަދު އަބޫލް ޣައިތު ވިދާޅުވީ "އިސްރާއީލުގެ އިސްތިއުމާރީ ބާރުތަކުން ކުރިއަށް ގެންދާ ބަދަލު ހިފުމުގެ އޮޕަރޭޝަންތަކުން ހަމަޖެހުމެއް ނުލިބޭނެ. އޭގެ ބަދަލުގައި އަޅުގަނޑުމެން އަނިޔާވެރިކަމާއި ލޭގެ އިތުރު ދައުރުތަކަށް ވައްޓާލާނެ" ކަމަށެވެ.

Advertisement

އޭނާ ވިދާޅުވީ "އަޅުގަނޑުމެން މިތިބީ ޣައްޒާގެ ފަލަސްތީން ރައްޔިތުންނާ އެއްބައިވަންތަކަމާއެކު" ކަމަށެވެ. އޭނާ އިތުރަށް ވިދާޅުވީ "މިއީ ވަގުތުން ހުއްޓުވައި އެންމެ ހަރުކަށި އިބާރާތުން ކުށްވެރި ކުރަން ޖެހޭ ގަތުލުއާންމެއް" ކަމަށެވެ.

ފަލަސްތީނު އޮތޯރިޓީގެ ފޮރިން މިނިސްޓަރު ރިޔާދު އަލް މާލީކީ ވިދާޅުވީ "ފަހަކަށް އައިސް ހިނގި ހާދިސާތަކުގައި ޝަހީދުވި މީހުންގެ އަދަދު 1،000 އަށް ވުރެ ގިނަ ކަމަށާއި އޭގެ ތެރެއިން ދެބައިކުޅަ އެއްބައި މީހުންނަކީ އަންހެނުންނާއި ކުޑަކުދިން" ކަމަށެވެ. އޭނާ އިތުރަށް ވިދާޅުވީ "ބައިނަލްއަގްވާމީ މުޖުތަމައު ހިމޭނުން ތިބެގެން ނުވާނެ ކަމަށާއި، ޣައްޒާއަށް އެހީ ގެނައުމުގެ މަގު ހުޅުވާލުމަށް އަޅުގަނޑުމެން ގޮވާލާ" ކަމަށެވެ.

ލީގުން ނެރުނު ސްޓޭޓްމެންޓްގައި "ދެފަރާތުން އާމުންނަށް އަމާޒުކޮށްދޭ ހަމަލާތަކާއި ބައިނަލްއަގްވާމީ ގާނޫނުތަކާ ހިލާފު ހުރިހާ އަމަލުތަކެއް" ކުށްވެރިކޮށްފައިވެ އެވެ.

އެގޮތުން "މިއަނިޔާވެރިކަން އިތުރަށް ފުޅާވުމުގެ ނުރައްކަލުން މި ސަރަހައްދާއި އަދި މި ސަރަހައްދުގެ ހަމަޖެހުން ރައްކާތެރިކުރުމަށް" ބައިނަލްއަގްވާމީ ފިޔަވަޅު އެޅުމަށް ވަނީ ގޮވާލައިފަ އެވެ.