އިސްރާއީލުގެ ލީޑަރުން ޣައްޒާ "މުޅިން ވަށާލުމަށް" އަމުރު ކުރުމުން، އިންސާނީ އެހީގެ ހުއްދަ ދޭން ޖެހޭ ކަމަށް އދގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ވިދާޅުވެއްޖެ އެވެ.

ބުދަ ދުވަހު ނޫސްވެރިންނަށް މައުލޫމާތު ދެއްވަމުން ގުޓަރެސް ވިދާޅުވީ ގާތްގަނޑަކަށް 220،000 ފަލަސްތީނު މީހުން މިހާރު ހިޔާވަހިކަން ހޯދަމުންދަނީ އދގެ ރިލީފް އެންޑް ވޯކްސް އެޖެންސީ ފޯ ފަލަސްތީން ރެފިއުޖީސް އިން ދަ ނީއާ އީސްޓް ނުވަތަ ޔޫއެންއާރުޑަބްލިއުއޭ އަށް ނިސްބަތްވާ 92 ފެސިލިޓީއެއްގަ އެވެ.

އެނާ ވިދާޅުވީ ހުރިހާ ވަގުތެއްގައި ވެސް އާންމުންގެ ރައްކާތެރިކަން ކަށަވަރު ކުރުމަށްޓަކައި އދ.ގެ ތަންތަނާއި ހޮސްޕިޓަލްތަކާއި ސްކޫލްތަކާއި ކްލިނިކްތަކަށް އެއްވެސް ހަމަލާއެއް އަމާޒުކޮށްގެން ނުވާނެ ކަމަށެވެ.

Advertisement

ގުޓަރެސް އިތުރަށް ވިދާޅުވީ "ފުރާނަ ސަލާމަތް ކުރުމަށް މުހިންމު ސާމާނުތައް -- ތެލާއި ކާނާ އަދި ފެން ހިމެނޭ ގޮތަށް -- ޣައްޒާއަށް ވަނުމަށް ހުއްދަ ދޭން ޖެހޭނެ. މިހާރު ބޭނުންވަނީ ހަލުވި އަދި ހުރަހެއް ނެތި އިންސާނީ އެހީތެރިކަން ފޯރުކޮށްދިނުމެވެ."

އޭނާ ފާހަގަކުރެއްވި ގޮތުގައި "ގެއްލޭނެ ވަގުތެއް ނެތް. ކޮންމެ ހިނދުކޮޅަކީ ގުނާލެވޭ" ކަމަށް ވިދާޅުވެ، ހާލަތު ގޯސް ނުވާނެ ގޮތަށް ފިޔަވަޅު އެޅުމަށް ކަމާބެހޭ ހުރިހާ ފަރާތްތަކަށް ގޮވާލެއްވި އެވެ.

މީގެ އިތުރުން އެމެރިކާގެ ޑިފެންސް ސެކްރެޓަރީ ލޮއިޑް އޮސްޓިން ބުދަ ދުވަހު ބެލްޖިއަމްގައި ނޫސްވެރިންނާ ވާހަކަ ދައްކަވަމުން ވިދާޅުވީ ވޮޝިންޓަނުން އިސްރާއީލަށް އަސްކަރީ އެހީ ފޮނުވުން ކުރިއަށް ގެންދާނެ ކަމަށެވެ.

އޮސްޓިން ވިދާޅުވީ އެމެރިކާ ސަރުކާރުން އިތުރު އަޔަން ޑޯމް އިންޓަސެޕްޓަރުތައް ފޯރުކޮށްދޭނީ ފަލަސްތީނުގެ އިސްލާމިސްޓް ޖަމާއަތް ހަމާސްގެ ރޮކެޓް ހަމަލާތަކުން އިސްރާއީލަށް ރައްޔިތުންނާއި ސިޓީތައް ރައްކާތެރިކުރެވޭނެ ކަމަށެވެ.

އޭނާ އިތުރަށް ވިދާޅުވީ "އިސްރާއީލުން އަމިއްލަ ނަފްސާއި ރައްޔިތުން ސަލާމަތުން ބެހެއްޓުމަށް ބޭނުންވާ ކަންކަން ލިބިފައިވާކަން ކަށަވަރު ކުރަމުން ގެންދާނަން" ކަމަށެވެ.