ސައުދީ އަރަބިއްޔާއިން އެމީހުންގެ ވާދަވެރިން ކަމަށްވާ ޔަމަނުގައި ހޫޘީ ޖަމާއަތުގެ ތޭރަ ގައިދީން ދޫކޮށްލާފައިވާ ކަމަށް ހޫޘީގެ އޮފިޝަލަކު ވިދާޅުވެއްޖެއެވެ.

ހޮނިހިރު ދުވަހު މިމީހުން ދޫކޮށްލާފައިވަނީ ޔަމަނުގެ އަހަރުތަކެއް ވަންދެން ހިނގަމުންދާ ހަމަނުޖެހުންތައް ނިމުމަކަށް ގެނައުމަށް ކުރާ މަސައްކަތުގެ ތެރެއިން އޮމާންގެ އޮފިޝަލުން ޔަމަނުގެ ވެރިރަށަށް ވަޑައިގެންނެވި ދަނޑިވަޅެއްގައެވެ.

ޔަމަނުގެ ހަމަނުޖެހުންތަކުގައި ގައިދީން ބަދަލުކުރުމުގެ މަޝްވަރާތަކާ ހަވާލުވެ ހުންނެވި ހޫޘީގެ އޮފިޝަލެއް ކަމަށްވާ، އަބްދުލް ޤާދިރު އަލް މޮރްތާދާ ވިދާޅުވީ ހޫތީގެ 13 ގައިދީއަކު ހޮނިހިރު ދުވަހު ވެރިރަށް ސަނާއަށް އައިސްފައިވާ ކަމަށެވެ.

Advertisement

އޭނާ ވިދާޅުވީ ގައިދީން ދޫކޮށްލީ ހޫޘީން މިނިވަންކުރި ސައުދީ ގައިދީއެއްގެ ބަދަލުގައި ކަމަށެވެ. އަދި ސައުދީގެ ގައިދީ ދޫކޮށްލީ ކޮން އިރަކު ކަމެއް އޭނާ ވިދާޅެއް ނުވެ އެވެ.

އދ މެދުވެރިއެއްގެ ގޮތުގައި އޮވެ ދެފަރާތުންވެސް 900 އެއްހާ ގައިދީން މިނިވަން ކުރުމަށްވަނީ ނިންމާފައެވެ.

ޔަމަނުގެ ހަމަނުޖެހުން ފެށިގެން އައީ 2014 ވަނަ އަހަރު ހޫތީން ސަންނާއާއި އެގައުމުގެ އުތުރުގެ ބޮޑު ބައެއް ބާރުގެ ދަށަށް ގެނައުމަށްފަހު އޭރުގެ ސަރުކާރު ވެރިކަމުން ދުރުކުރުމުންނެވެ. އޭގެ ފަހުން ސަރުކާރުގެ އިސްވެރިންވަނީ ފިލާގެން ގޮސް ސައުދީ އަރަބިއްޔާގެ އެހީ ހޯދުމަށްފަހު އެޤައުމަށް އަރުވާލެވިފައެވެ.

ހޫޘީންގެ މި ފިޔަވަޅާ ގުޅިގެން މަސްދުވަސްތަކެއް ފަހުން ސައުދީ އިން އިސްވެ އޮވެ ވަނީ ބައިނަލްއަޤްވާމީ ގޮތުން ޤަބޫލުކުރެވޭ ސަރުކާރު އަލުން ވެރިކަމަށް ގެނައުމުގެ މަސައްކަތްފަށާފައެވެ. އޭގެ ސަބަބުން ހަނގުރާމަވެރިންނާއި އާންމުން ހިމެނޭ ގޮތަށް 150،000 އަށް ވުރެ ގިނަ މީހުން ވަނީ މަރުވެފައެވެ.