އީރާނުގެ ރައީސް އިބްރާހިމް ރައިސީ ސިފަކުރެއްވި ގޮތުގައި ފަލަސްތީނުގެ އޮޕަރޭޝަން އަލް އަގްސާ ސްޓޯމް އަކީ ޒަޔަނިސްޓް ޖަރީމާތައް އިތުރުވުމާއެކު އޭގެ އުރައިން ނިކުތް ކަނޑިއެއް ކަމަށެވެ.

ރައީސް ރައިސީ މިހެން ވިދާޅުވީ އޮމާންގެ ސުލްތާން ހައިތަމް ބިން ތާރިކްއާ ހޮނިހިރު ދުވަހު ފޯނުން ވާހަކަ ދައްކަވަމުން ސަރަހައްދީ އަދި ބައިނަލްއަގްވާމީ މައްސަލަތައް ހައްލުކުރުމުގައި އޮމާންގެ ދައުރަށް ތައުރީފު ކުރައްވަމުން ނެވެ.

އޭނާ ވިދާޅުވީ ފެނާއި ކަރަންޓް ކަނޑާލައި ބޭހާއި ކާބޯތަކެތި ޑެލިވަރީ ނުކުރުމާއެކު ޒަޔަނިސްޓް ވެރިކަމާއި އެކުވެރި ގައުމުތަކުން ޣައްޒާގައި ގިނަ ބަޔަކު ގަތުލުކޮށް ގެދޮރާއި ރަށް ދޫކޮށްލަން މަޖުބޫރު ކުރަމުންދާ ކަމަށެވެ.

Advertisement

ޒަޔަނިސްޓް ޖަރީމާތަކަށް އެމެރިކާއާއި ހުޅަނގުގެ އެހެން ޤައުމުތަކުން ލިބޭ ޙައްދެއް ނެތް ތާއީދުގެ ސަބަބުން ޙާލަތު އުނދަގޫވެފައިވާކަން ފާހަގަކުރައްވައި، މި އަނިޔާވެރިކަން ހުއްޓުވުމަށްޓަކައި މުޅި ދުނިޔޭގެ އިސްލާމީ ޤައުމުތަކާއި މިނިވަންކަމަށް ވަކާލާތުކުރާ މީހުން ވަގުތުން ތަދައްޚުލުވުން މުހިންމުކަމަށް ރައީސް އިލްތިމާސް ކުރެއްވިއެވެ.

އޮމާންގެ ސުލްތާން އޭނާގެ ފަރާތުން ވިދާޅުވީ އަނިޔާވެރިކޮށް ފަލަސްތީނުގެ ރައްޔިތުން މަޖުބޫރުކޮށްގެން ހިޖުރަކޮށް، އެމީހުންގެ މައްޗަށް ގެދޮރު ދޫކޮށްލުން ލާޒިމު ކުރުމުގެ ސިޔާސަތު އަނެއްކާވެސް ޒަޔަނިސްޓް ވެރިކަމަށް ދޫކޮށްލަން ނުޖެހޭނެ ކަމަށެވެ.

ބިން ތާރިކް ވިދާޅުވީ ޖަރީމާތައް ނިމުމަކަށް ގެނައުމަށް ނުފޫޒު ފޯރުވޭނެ ހުރިހާ ފަރާތްތަކަކާ ވެސް އޮމާނުން މަޝްވަރާ ކުރަމުން އަންނަ ކަމަށެވެ.