ޒަޔަނިސްޓު އިސްރާޢީލުގެ ފައުޖުތަކުން ޣައްޒާގައި ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 5,087 އަށް އަރައިފިއެވެ. އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާއަށް މެދުކެނޑުމެއް ނެތި ބޮން އަޅަމުންދާއިރު, މި އުދުވާނުގައި ޝަހީދު ކޮށްލާފައިވާ މީހުންގެ ތެރެއިން 40 އިންސައްތައަކީ ކުށެއް ނެތް ކުޑަކުދިންނެވެ.

ފާއިތުވި 24 ގަޑިއިރެއްހާ އިރުގެ ތެރޭގައި ޔަހޫދީ އަސްކަރިއްޔާގެ ޑްރޯންތަކާއި މަތިންދާބޯޓުތަކުން ޣައްޒާގެ މުސްލިމުން ދިރިއުޅޭ ގެދޮރާއި ހޮސްޕިޓަލް ފަދަ ޢިމާރާތްތަކަށް ދިން ހަމަލަތަކުގައި 400 އެއްހާ މީހުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ބުނެއެވެ. އެ މުއްދަތުގެ ތެރޭގައި ޔަހޫދީ ފައުޖުތަކުން ވަނީ 320 ފަހަރު ޣައްޒާއަށް ބޮން އަޅާފައެވެ.

ޒަޔަނިސްޓު އިސްރާޢީލުގެ ޖައްބާރު އަސްކަރިއްޔާގެ މި އުދުވާންތަކުގައި ގެދޮރު ނެތިކޮށްލާފައިވާ މީހުންގެ ޢަދަދު މިހާރު މިލިޔަނަކަށް ވުރެ އިތުރުވެފައިވާ ކަމުގައި އ.ދއިން ވަނީ ބުނެފައެވެ. މި އުދުވާނުގެ ތެރެއިން ޣައްޒާގެ އެތަކެއް ހާސް ޢިމާރާތެއް ވަނީ ސުންނާފަތިކޮށް ބިމާ ހަމަކޮށްލާފައެވެ. އޭގެ ތެރޭގައި ހޮސްޕިޓަލްތަކާއި ޞިއްޙީ މަރުކަޒުތައް ހިމެނެއެވެ. އަދި, ޣައްޒާއަށް ކާބޯތަކެތި އެތެރެ ކުރުން ވަނީ ހުއްޓުވާފައެވެ. ފެން ވެސް ވަނީ ކަނޑައިލާފައެވެ.

Advertisement

ޣައްޒާއަށް ފާއިތުވި 24 ގަޑިއިރުގެ ތެރޭގައި ދީފައިވާ ހަމަލަތަކުގެ ތެރެއިން އެއް ހަމަލަ އަމާޒު ކޮށްފައި ވަނީ ޢާންމުން ދިރިއުޅޭ ޢިމާރާތަކަށެވެ. އެ ހަމަލާގައި 17 މީހުން ޝަހީދުވި ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ބުނެއެވެ. އެހެން ޢިމާރާތަކަށް ދިން ހަމަލައެއްގައި ވެސް 10 މީހުން ޝަހީދު ކޮށްލިއެވެ. ޔަހޫދީންގެ އުދުވާނުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ތާށިވެފައި އަދިވެސް 1,000 އަށްވުރެ މީހުން ތިބި ކަމަށް ބެލެވޭއިރު, އޭގެ ތެރޭގައި ގިނައީ ކުޑަކުދިން ކަމުގައި ވެސް ޣައްޒާގެ ޞިއްޙަތާ ބެހޭ ވުޒާރާއިން ބުންޏެވެ.

ޔަހޫދީ ފައުޖުތަކުން މިހާރު ދަނީ އެއްގަމު މަގުން ޣައްޒާއަށް އަރަން ތައްޔާރު ވަމުންނެވެ. މި ކަމަށް ތައްޔާރުވުމުގެ ގޮތުން ޣައްޒާގެ ރަށްބޭރަށް 300,000 އަށްވުރެ ގިނަ ޖައްބާރު ސިފައިންގެ ލަޝްކަރަކާއި ބަރުހަތިޔާރު ވަނީ ޖަމާކޮށްފައެވެ. މިހާރު ވެސް ބައެއް ސިފައިން ޣައްޒާއަށް ވަންނަން ފަށާފައިވާ ކަމުގައި ރިޕޯޓުތައް ބުނެއެވެ.

ޢައްޒާއަށް އެރުމުގެ ބޭނުމަކީ, ޙަމާސް ޖަމާޢަތުން ރަހީނު ކޮށްފައިވާ ޔަހޫދީން ސަލާމަތް ކުރުން ކަމުގައި އިސްރާޢީލުން ބުނެއެވެ. އޮކްޓޫބަރު 7 ވަނަ ދުވަހު ޙަމާސް ޖަމާޢަތުގެ މުޖާހިދުން އިސްރާޢީލަށް ވަދެ ހިންގި އޮޕަރޭޝަނުގައި 222 މީހުން ރަހީނު ކޮށްފައިވާ ކަމުގައި އިސްރާޢީލުން ބުނެއެވެ.

ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.