ޗިޕް އުފައްދާގެން ސެމްސަންގް އަށް ލިބުނު ފައިދާ 96 ޕަސެންޓް ވަނީ ދަށްގޮސްފައެވެ.

މިއީ ފާއިތުވެދިޔަ 15 އަހަރު ތެރޭގައި އެންމެ ދަށަށްދިޔަ ފަހަރުއެވެ. އެހެންކަމުން ސެމްސަންގް އިލެކްޓްރޯނިކްސް އިން ޗިޕް އުފައްދާ މިންވަރު މަދުކުރާނެ ކަމަށް ވަނީ އިއުލާންކޮށްފައެވެ.

ދެކުނު ކޮރެއާގެ ޓެކް ޖަޔަންޓް ކުންފުނިން ހުކުރު ދުވަހު ބުނީ ދުނިޔޭގެ އެކި ކަންކޮޅުތަކުގައި މެމޮރީ ޗިޕް ވިއްކުން ދަށްވަމުންދާއިރު ފުރަތަމަ ކުއާޓަރުގެ ފައިދާ 96 ޕަސެންޓަށް ވުރެ ދަށް ދާނެ ކަމަށް ލަފާކުރާ ކަމަށެވެ.

Advertisement

ޖެނުއަރީ-މާޗް މަހު ސެމްސަންގްގެ ފައިދާ 600 ބިލިއަން ވޮން (455 މިލިއަން ޑޮލަރު) އަށް ދަށްވާނެ ކަމަށް ލަފާކުރެވޭއިރު، މިއީ 14 އަހަރުގެ އެންމެ ދަށް އަދަދެއް ކަމަށް އެ ކުންފުނިން ރެގިއުލޭޓަރީ ފައިލިންގައި ބުނެފައިވެ އެވެ.

ދެކުނު ކޮރެއާގެ އެންމެ ބޮޑު ކުންފުނި ސެމްސަންގުން އުފެއްދުންތެރިކަން ކުޑަކުރާނީ ކިހާވަރަކަށް ކަމެއް ހާމަކޮށްފައި ނުވި ނަމަވެސް އަދަދު މަދުކުރުމަކީ "މާނަހުރި ކަމެއް" ކަމަށް ބުނެފައިވެ އެވެ.

"އަޅުގަނޑުމެން މިދަނީ މެމޮރީ ޗިޕް އުފެއްދުން މާނަހުރި މިންވަރަކަށް ދަށްކުރަމުން، ހާއްސަކޮށް ސަޕްލައި ސެކިއުރިޓީ ލިބިފައިވާ އުފެއްދުންތަކުގެ އުފެއްދުން،" އެކުންފުނިން ނެރުނު ބަޔާނުގައިވެ އެވެ.

މި އިއުލާނަކީ ދުނިޔޭގެ އިގްތިސާދީ ހާލަތު ގޯސްވަމުންދާ ކަމުގެ އެންމެ ފަހުގެ ނިޝާން ކަމަށްވެސް ވެދާނެއެވެ. އެގޮތުން ދެކުނު ކޮރެއާގެ ޗިޕް އުފައްދާ ސެމްސަންގް އަދި އެސްކޭ ހައިނިކްސް ފަދަ ކުންފުނިތަކަށް އަހަރުތަކެއް ވަންދެން ރެކޯޑް ފައިދާތަކެއް ލިބިފައި ވަނީ ޗިޕްގެ ޑިމާންޑް ބޮޑުވުމުންނެވެ.

ސެމްސަންގްގެ ފައިދާ 2022 ވަނަ އަހަރުގެ ފަހު ކުއާޓަރުގައި ގާތްގަނޑަކަށް 70 ޕަސެންޓް ދަށްވެފައިވާއިރު، އެއީ ޔޫކްރޭންގައި ރަޝިޔާއިން ކުރި ހަނގުރާމައާއި އިންފްލޭޝަން މަތިވުމުގެ ސަބަބުންނެވެ.