އީރާނާ ގުޅުން ހުރި ޖަމާއަތްތަކުގެ ހަމަލާތައް އިތުރުވަމުންދާ ދަނޑިވަޅެއްގައި އިތުރު 900 އެއްހާ އެމެރިކާ ސިފައިން މެދުއިރުމައްޗަށް އައިސްފައިވާކަމަށް ނުވަތަ އެމެރިކާގެ ސިފައިންނަށް ވައިގެ ދިފާއީ ނިޒާމު ވަރުގަދަ ކުރުމަށް އެތަނަށް ދަތުރު ކުރަމުންދާ ކަމަށް ޕެންޓަގަން އިން ބުރާސްފަތި ދުވަހު ބުނެފި އެވެ.

އިސްރާއީލާއި ހަމާސް ހަނގުރާމަ ބޮޑުވަމުންދާއިރު، މިދިޔަ ހަފްތާގެ ތެރޭގައި އެމެރިކާ އާއި ކޯލިޝަން ސިފައިންނަށް އިރާގުގައި މަދުވެގެން 12 ފަހަރު އަދި ސީރިއާގައި ހަތަރު ފަހަރު ހަމަލާދީފައިވާ ކަމަށް ޕެންޓަގަންގެ ތަރުޖަމާނު ބްރިގޭޑިއާ ޖެނެރަލް ޕެޓްރިކް ރައިޑާ ނޫސްވެރިންނަށް ވިދާޅުވި އެވެ.

އެމެރިކާގެ ޖުމްލަ 21 ސިފައިންނަށް ކުދިކުދި އަނިޔާތަކެއް ލިބިފައިވާއިރު، އޭގެ ތެރެއިން ގިނައީ ސިކުނޑިއަށް ލިބުނު ޓްރައުމަޓިކް އަނިޔާތަކެކެވެ.

Advertisement

އޮކްޓޯބަރު މަހުގެ ހަތް ވަނަ ދުވަހު ހަނގުރާމަ ފެށި ފަހުން އެމެރިކާއިން ވަނީ އީރާނާއި އީރާނުގެ ތާއީދު އޮންނަ ޖަމާއަތްތައް ހުއްޓުވަން މަސައްކަތް ކުރުމުގެ ގޮތުން ދެ މަތިންދާބޯޓު އުފުލާ މަނަވަރު ހިމެނޭ ގޮތަށް ހަނގުރާމަ މަނަވަރުތަކާއި ހަނގުރާމަ މަތިންދާބޯޓުތައް އެ ސަރަހައްދަށް ފޮނުވާފަ އެވެ.

ރައިޑާ ވިދާޅުވީ އެމެރިކާ ސިފައިންނަށް އަމަޒާކޮށް ބުރާސްފަތި ދުވަހުގެ ވަގުތެއްގައި އިރާގުގައި ދިން ހަމަލާ ނާކާމިޔާބުވެފައިވާ ކަމަށެވެ.

"މިކަމާއިގުޅިގެން ފޯރުކޮށްދޭން އިތުރު ވަކި މައުލޫމާތެއް ނެތް (އެމެރިކާގެ މުވައްޒަފުންނަށް ހަމަލާދިނުމުގެ) ޒިންމާ ނަގާފައިވާ ވަކި ވަކި ޖަމާއަތްތަކުގެ ގޮތުން، މި ޖަމާއަތްތަކަކީ އީރާނާ ގުޅުން ހުރި ޖަމާއަތްތަކެއްކަން އަޅުގަނޑުމެންނަށް އެނގޭ" ރައިޑާ ވިދާޅުވި އެވެ.

އީރާނަށް ތާއީދުކުރާ ކަމަށް ޝައްކުކުރެވޭ ޖަމާއަތްތަކުން ދޭ ހަމަލާތައް އިތުރުވަމުންދާއިރު އެމެރިކާގެ އަސްކަރިއްޔާއިން މެދުއިރުމަތީގެ ބާރުތައް ހިމާޔަތް ކުރުމަށް އާ ފިޔަވަޅުތަކެއް ދަނީ އަޅަމުންނެވެ.

އެ ފިޔަވަޅުތަކުގެ ތެރޭގައި އެމެރިކާގެ އަސްކަރީ ޕެޓްރޯލްތައް އިތުރުކުރުމާއި، ބޭސް ފެސިލިޓީތަކަށް ވަނުން ހަނިކުރުމާއި، ޑްރޯން އަދި އެހެނިހެން ސަވައިލެންސް އޮޕަރޭޝަންތައް ހިމެނޭ ގޮތަށް ޖާސޫސީ މައުލޫމާތު އެއްކުރުން އިތުރުކުރުން ހިމެނޭ ކަމަށް އޮފިޝަލުން ބުނެއެވެ.