އިނގިރޭސި ޕްރިމިއާ ލީގުގައި މިރޭ ފުލަމްގެ މައްޗަށް 1-0 އިން މެންޗެސްޓާ ޔުނައިޓެޑުން ކުރި ހޯދައިފި އެވެ.

މި މޮޅާއެކު 11 މެޗު ކުޅެގެން ލިބުނު 18 ޕޮއިންޓާ އެކު ޔުނައިޓެޑް އޮތީ ލީގުގެ ހަވަނައިގަ އެވެ. ފުލަމް އޮތީ 12 ޕޮއިންޓާ އެކު ލީގުގެ 14 ވަނައިގަ އެވެ.

ފުލަމްގެ ދަނޑުގައި ކުޅުނު މެޗުގައި ފެނިގެންދިޔަ ހަމައެކަނި ގޯލު ޔުނައިޓެޑަށް މެޗުގެ ފަހު ވަގުތުކޮޅުތެރޭ ކާމިޔާބުކޮށްދިނީ އެޓީމުގެ ކެޕްޓަން ބްރޫނޯ ފެނާންޑޭސް އެވެ. ބްރޫނޯ މި ގޯލު ކާމިޔާބު ކުރީ ފުލަމްގެ ޕެނަލްޓީއޭރިއާގެ ބޭރުގައި ހުރެ ފޮނުވާލި ހަމަލާއެއް ގޯލުގެ ތިރީ ކަނަށް އަމާޒުކޮށްލައިގެންނެވެ.

Advertisement

މެޗުގެ ދެވަނަ ހާފްގައި ފުލަމް އިން ރަނގަޅު ކުޅުމެއް ދެއްކި ނަމަވެސް ޔުނައިޓެޑްގެ ގޯލަށް މާބޮޑު ނުރައްކަލެއް އެޓީމަށް ކުރެވިފައެއް ނުވެ އެވެ. ޔުނައިޓެޑާ ދެކޮޅަށް އެންމެފަހުން ފުލަމް އިން ކުޅުނު 18 މެޗުން ވެސް އެޓީމަށް މޮޅެއް ހޯދިފައެއް ނުވެ އެވެ. ފުލަމް އަށް އެންމެފަހުން ޔުނައިޓެޑް ބަލިކުރެވުނީ 2009 ވަނަ އަހަރު އެވެ.

ލީގުގައި ޔުނައިޓެޑް ދެން ބައްދަލުކުރާނީ ލޫޓަން ޓައުންއާ އެވެ. ފުލަމް ނިކުންނާނީ އެސްޓަންވިލާއާ ދެކޮޅަށެވެ.