އަންނަ މަހު އޮލިމްޕަހަށް ގެންނަން ތައްޔާރުވަމުން އަންނަ ފިލްމު "ނޮވެމްބާ" ގެ ޓިކެޓް އޮންލައިންކޮށް ވިއްކަން ފަށައިފި އެވެ.

އެ ފިލްމު ގެނެސްދޭ ޑާކް ރެއިން އެންޓަޓައިންމަންޓުން މިއަދު ބުނީ އެތަނުގެ ވަޓްސްއެޕް/ވައިބާ ނަންބަރަށް މެސެޖްކޮށްގެން ޓިކެޓް ބުކުކޮށް، ޓިކެޓަށް ފައިސާ ޓްރާންސްފާކުރެވޭނެ ކަމަށެވެ. ޓްރާންސްފާކުރާނީ ޑާކް ރެއިން އެންޓަޓައިމަންޓްގެ ނަމުގައި ހުޅުވާފައިވާ އެކައުންޓް 7701139602001 އަށެވެ.

އަހަރުގެ ފިލްމު ގޮތުގައި ގެނެސްދޭ "ނޮވެމްބާ" ޕްރީމިއާ ކުރަން ހަމަޖެހިފައި ވަނީ އަންނަ މަހުގެ 4 ގަ އެވެ. މިއީ އަލީ ޝިފާއު (ޗިއްޕެ) އާއި ޕްރޮޑިއުސަރު މުހައްމަދު އަލީ (މޮގާ) ގެ އަންހެނުން އައިޝަތު ފުއާދު ތައުފީގު ޑައިރެކްޓްކޮށްފައިވާ އަސަރު ގަދަ ލޯބީގެ ފިލްމެކެވެ. "ނޮވެމްބާ" ލީޑް ތަރިންނަކީ މަރިޔަމް މަޖުދާ (މަޖޫ) އާއި ޖުމައްޔިލް ނިމާލު (ޖުމަލް) އެވެ.

Advertisement

މި ފިލްމަކީ ޑާކް ރެއިނުން މި އަހަރު އޮލިމްޕަށް ގެންނަ ދެވަނަ ފިލްމެވެ. މި އަހަރު އެތަނުގައި އެޅުވި ފުރަތަމަ ފިލްމަކީ ފެބްރުއަރީ 6 ގައި އެޅުވި ޑްރާމާ ފިލްމު "ބީވީމާ" އެވެ.

މިހާރު އޮލިމްޕަހުގައި ދައްކަމުން އަންނަނީ މި މަހުގެ 4 ގައި ޕްރީމިއާކުރި، އިލްޔާސް ވަހީދު (އިއްލެ) ޑައިރެކްޓްކުރި ޑާކް ކޮމެޑީ "ފްރީ ޑެލިވަރީ" އެވެ.