ހޮލިވުޑްގެ މަޝްހޫރު ތަރިން ކަމަށްވާ ރަޔަން ގޮސްލިން އާއި އެމިލީ ބްލަންޓްގެ އެކްޝަން ކޮމެޑީ "ދަ ފޯލް ގާއި" ރިލީޒްކުރުން ދެ މަހަށް ފަސްކޮށްފި އެވެ.

ޑޭވިޑް ލީޗް ޑައިރެކްޓްކޮށްފައިވާ ފިލްމު ސިނަމާތަކަށް ގެންނަން މިހާރު ތާވަލުކޮށްފައި ވަނީ އަންނަ އަހަރުގެ މެއި 3 އަށެވެ. ކުރިން އެ ރިލީޒްކުރާ ގޮތަށް އޮތީ މާޗް 1 ގަ އެވެ. "ދަ ފޯލް ގާއި" ގެ ތާރީހަށް ބަދަލު ގެނެއީ ކުރިން މެއި 3 ގައި ގެނެސްދޭން ތާވަލުކޮށްފައި އޮތް އެކްޓަރު ރަޔަން ރެނޯލްޑްސްގެ ސުޕަހީރޯ ފިލްމު "ޑެޑްޕޫލް 3" އެ ތާރީހުގައި ނުގެނެސްދޭން ނިންމުމާ ގުޅިގެންނެވެ.

"ދަ ފޯލް ގާއި" ގެ ޑައިރެކްޓަރު ޑޭވިޑް އަކީ "ޑެޑްޕޫލް 2" ގެ ވެސް ޑައިރެކްޓަރެވެ.

Advertisement

"ޑެޑްޕޫލް 3" ގެ މަސައްކަތްތަކަށް އަރާފައި އޮތް ބައެއް ކަހަލަ ބުރޫތަކާ ހެދި މިހާރު އާ ތާރީހަކަށް ހަމަޖައްސާފައި ވަނީ އަންނަ އަހަރުގެ ޖުލައި 26 ގަ އެވެ.

އަންނަ އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ދަ ފޯލް ގާއި" އަކީ ހަމަ އެ ނަމުގައި 1980 ގެ ތެރޭގައި ގެނެސްދިން ސިލްސިލާ އަށް ބިނާކޮށް ހަދާފައިވާ އެއްޗެކެވެ. ޔުނިވާސަލް ޕިކްޗާސްގެ މި ފިލްމުގެ ކާސްޓްގައި އާރޮން ޓޭލާ-ޖޯންސަނާއި ވިންސްޓަން ޑޫކާއި ހަނާ ވެޑިންގަމްގެ އިތުރުން ސްޓެފެނީ ސޫ ހިމެނެ އެވެ.

ޑައިރެކްޓަރު ޑޭވިޑްގެ އެންމެ ފަހުގެ ފިލްމަކީ ބްރެޑް ޕިޓާ އެކީ މިދިޔަ އަހަރު ގެނެސްދިން "ބްލެޓް ޓްރެއިން" އެވެ.