އެމެރިކާގެ ޔުނިވަސިޓީއެއްގައި ކިޔަވަމުން އަންނަ ފަލަސްތީނުގެ ތިން ދަރިވަރެއްގެ ގަޔަށް ބަޑި ޖަހައި ޒަހަމްކޮށްލައިފި އެވެ.

މީޑިއާތަކުން ބުނީ އެ ތިން ދަރިވަރުންނަކީ ވާމަންޓް ޔުނިވިސިޓީގައި ކިޔަވަމުން އަންނަ ހިޝާމް އަވަރްތާނީ އާއި ތަހުސީން އަހުމަދުގެ އިތުރުން ކިނާން އަބްދުލްހާމިދު ކަމަށެވެ. އެ ދަރިވަރުންނަށް ހަމަލާ ދިނީ އެ މީހުން ކިޔަވާ ޔުނިވަސިޓީގެ ބާލިންޓަންގެ ކެމްޕަހުގެ ކައިރީގަ އެވެ.

ހޮނިހިރު ދުވަހު ފަލަސްތީނުގެ ތިން ދަރިވަރަކަށް ހަމަލާ ދިނީ ނަސްލީ ގޮތުން ދިމާކޮށް ފަލަސްތީނާ މެދު ނަރުފަރަތާއި ރުޅިވެރިކަން އުފައްދަން ކުރަމުންދާ މަސައްކަތުގެ ތެރެއިން ކަމަށް ބައެއް މީޑިއާތަކުން ބުންޏެވެ. ތިން ޒުވާނުންނަށް ހަމަލާދީ ދިން މީހާ ހޯދުމުގެ މަސައްކަތް ފުލުހުން މިހާރު އަންނަނީ ކުރަމުންނެވެ.

Advertisement

ބާލިންޓަންގެ ފުލުހުންގެ ވެރިޔާ ޖޮން މުރާ ވިދާޅުވީ ހަމަލާ ދިން މީހާ ހޯދުމުގެ މަސައްކަތް ކުރަމުން އަންނަ އިރު، ޒަހަމްވި ތިން ޒުވާނުންގެ ތެރެއިން އެކެއްގެ ހާލު ސީރިއަސް ކަމަށެވެ.

ފަލަސްތީނުގެ ތިން ޒުވާނަކަށް ދިން ހަމަލާއާ ގުޅިގެން އެމެރިކަން-އިސްލާމިކް ރިލޭޝަންސް ކައުންސިލުން ވަނީ ހަމަލާދިން މީހާއާ ހައްޔަރުކުރަން އޭނަ ބެހޭ މައުލާތު ހިއްސާކޮށްދޭ މީހަކަށް އިނާމެއްގެ ގޮތުގައި 10،000 ޑޮލަރު ދޭން ނިންމައިފަ އެވެ.

މިދިޔަ މަހުގެ 7 ގައި ހަމާސް އިން އިޒްރޭލަށް ދިން ހަމަލާގެ ފަހުން، އެމެރިކާގައި ފަލަސްތީނުގެ މީހުންނަށް ދެމުންދާ ހަމަލާތަކާއ ދެމުންދާ އިންޒާރުތައް ވަރަށް ބޮޑަށް އިތުރުވެފައިވެ އެވެ. އިޒްރޭލުން ފަލަސްތީނަށް ދެމުންދާ ހަމަލާތަކުގައި މިހާތަނަށް 14،000 އަށް ވުރެ ގިނަ މީހުން ޝަހީދުކޮށްފައިވެ އެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.