ޣައްޒާގެ މުސްލިމުންނާ ދެކޮޅަށް ހިންގަމުން ދިޔަ ލާއިންސާނީ އުދުވާންތައް މެދުކަނޑައިލުމަށް ހަދާފައިވާ އެއްބަސްވުމާ ޔަހޫދީން ޚިލާފުވަމުންދާ ކަމަށް ޙަމާސް ޖަމާޢަތުން ތުހުމަތު ކޮށްފިއެވެ. ޣައްޒާގައި ވެރިކަން ކުރާ ޙަމާސް ޖަމާޢަތުގެ ތަރުޖަމާނު އުސާމާ ޙަމްދާން ވިދާޅުވީ، އެއްބަސްވުމާ ޔަހޫދީން ޚިލާފުވަމުންދާ ކަމުގެ މަޢުލޫމާތާ ހެކި، ޤަޠަރާއި މިޞްރުގެ އޮފިޝަލުންނާ ހިއްސާ ކޮށްފައިވާނެ ކަމުގައެވެ. އެއްބަސްވުން އެކުލަވައިލުމުގައި މެދުވެރިއެއްގެ ދައުރު އަދާކޮށްފައި ވަނީ ޤަޠަރުންނެވެ.

ޙަމްދާން ވިދާޅުވީ، އެއްބަސްވުމާ އެއްގޮތަށް ޣައްޒާގެ އުތުރުގެ ސަރަޙައްދުތަކަށް ވެސް އިންސާނީ އެހީގެ ސާމާނު ފޯރުކޮށްދިނުމުގެ ފުރުޞަތު ޔަހޫދީން ދޭން ޖެހޭނެ ކަމުގައެވެ. އެއްބަސްވުމުގެ ފުރަތަމަ ދެ ދުވަހުގެ ތެރޭގައި އެހީގެ ސާމާނު ބަރުކޮށްފައިވާ 340 އުޅަނދު އެތެރެވެފައިވާއިރު، ޣައްޒާގެ އުތުރުގެ ސަރަޙައްދަށް ފޮނުވާފައި ވަނީ އެންމެ 65 އުޅަނދު ކަމުގައި ޙަމްދާން ވިދާޅުވިއެވެ. މިއީ، ޔަހޫދީން އެއްބަސްވެފައިވާ ޢަދަދަށްވުރެ ދެބައިކުޅަ އެއްބައި މަދު ޢަދަދެކެވެ.

ޣައްޒާއަށް ބޮން އެޅުން މެދުކަނޑައިލާފައިވީ ނަމަވެސް، ޔަހޫދީން އަދިވެސް ދަނީ ހުޅަނގު އައްސޭރީގައި ލާއިންސާނީ ޖަރީމާތައް ހިންގަމުންނެވެ. ހުޅަނގު އައްސޭރީގައި ޔަހޫދީ ފައުޖުން އެންމެ ފަހުން ހިންގި ލާއިންސާނީ އުދުވާންތަކުގައި ފަލަސްޠީނުގެ ހަ މީހުން ޝަހީދު ކޮށްލިއެވެ. އަދި، އިތުރު ހަތް މީހުން ޒަޚަމު ކޮށްލިއެވެ.

Advertisement

ފަލަސްޠީނުގެ ނޫހެއް ކަމުގައިވާ ވަފާއިން ބުނީ، ޔަހޫދީ ފައުޖުން ޖިނީނަށް އަރާފައިވާ ކަމުގައެވެ. އަދި، ސަރުކާރު ޢިމާރާތްތަކާއި، ހޮސްޕިޓަލްތަކާއި، ރެޑް ކްރެސެންޓް ސޮސައިޓީގެ އޮފީސް ވަށައިލުމަށްފަހު، އެ ސަރަޙައްދުގައި ހަރަކާތްތެރިވަމުން ދިޔަ ފަލަސްޠީނުގެ ރައްޔިތުންނަށް ހަމަލަދީފައިވާ ކަމުގައެވެ. ފަލަސްޠީނުގެ ރެޑް ކްރެސެންޓުން ވަނީ މި ކަން ކަށަވަރު ކޮށްދީފައެވެ.

ހުޅަނގު އައްސޭރީގައި ޝަހީދު ކޮށްލާފައިވާ މީހުންގެ ތެރޭގައި 25 އަހަރުގެ ޑޮކްޓަރެއް ވެސް ހިމެނެއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، އެ ޑޮކްޓަރަށް ބަޑިން ހަމަލަދީ ޝަހީދު ކޮށްލާފައި ވަނީ އޭނާ ދިރިއުޅޭ ގޭގެ ދޮރުމަތީގައި މަޑުކޮށްލައިގެން ހުއްޓާ ކަމުގައެވެ.

އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީން ފެދި ލާއިންސާނީ އުދުވާނާ އެކު ހުޅަނގު އައްސޭރީގައި ވެސް ޔަހޫދީން ވަނީ އުދުވާންތައް އިތުރު ކޮށްފައެވެ. މި އުދުވާންތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 229 އަށް އަރާފައެވެ. އޭގެ ތެރޭގައި 52 މައުސޫމް ކުޑަކުދިން ވެސް ހިމެނެއެވެ. އަދި، 3,000 އެއްހާ މީހުން ވަނީ ހައްޔަރު ކޮށްފައެވެ.