އޭނަ އަކީ އެއްވެސް އިރެއްގައި ޕާޓީކުރާ މީހެއް ނޫން ކަމަށާއި އަބަދު ވެސް ފޯކަސް ކުރަނީ ކުރާ މަސައްކަތްތައް ކަމަށް ބޮލީވުޑްގެ ތަރި ސަލްމާން ޚާން ބުނެފި އެވެ

މިހާރު ސިނަމާތަކުގައި ދައްކަމުން އަންނަ "ޓައިގާ 3" ގެ ބަތަލު ޕިންކްވިލާ އަށް ދިން އިންޓަވިއުއެއްގައި ބުނީ ބޮލީވުޑްގެ އެހެން ތަރިންހެން ޕާޓީކުރުމުގެ އާދަ އަކީ އޭނަ މާ ގަޔާވާ ކަމެއް ނޫން ކަމަށެވެ.

"އެހެންވެ އަހަރެން ވަރަށް ނުފެންނާނެ ބޭރުތެރެއިންނަށް. ޕާޓީކޮށް މަޖާކުރުމާއި ގިނަ ބަޔަކު އެއްވެގެން މީސްމީހުންގެ ވާހަކަ ދެއްކުން ފަދަ ކަންކަމަކީ އަހަރެން ކުރާ ހިތްވާ ކަމެއް ނޫން،" އަންނަ މަހު 58 އަހަރު ފުރޭ އެކްޓަރު ބުންޏެވެ. "އިންޑަސްޓްރީގެ ބައެއް މީހުން ގަބޫލުކުރާ ގޮތުގައި މީހާ ކުރިއަށް ދާނީ ޕާޓީކުރުން ގިނަވި ވަރަކަށް އަދި އެ މީހެއްގެ ނެޓްވޯކް ބޮޑުކުރި ވަރަކަށް. އެކަމަކު އެއީ އަހަރެން ގަބޫލުކުރާ ކަމެއް ނޫން."

Advertisement

ކާމިޔާބު އެތައް ފިލްމެއް ކުޅެފައިވާ އެކްޓަރު ބުނި އޭނަ އަބަދު ވެސް އިސްކަން ދެނީ މަސައްކަތްތައް ކަމަށެވެ. އެގޮތުން ފިލްމީ މަސައްކަތްތަކާ ގުޅުން ހުރި ކަންކަމާއި އޭނަގެ "ބީން ހިއުމަން" ފައުންޑޭޝަންއާ ގުޅުން ހުރި ގިނަ ކަންކަމާއި މަޝްވަރާތައް ވެސް ކުރިއަށް ދާނީ ގޭގައި ކަމަށް ބުންޏެވެ.

"އެކަހަލަ މަޝްވަރާތައް ވެސް އާންމު އުސޫލުގެ ދަށުން ކުރިއަށް ދާނީ ގޭގައި. އަހަންނަކީ ވަރަށް ފެމިލީ މީހެއް. އެހެންވީމަ އާއިލާ މީހުންނާ އެކީ ވަގުތު ހޭދަކުރުމަކީ ވަރަށް އިސްކަންދޭ ކަމެއް،" ސަލްމާން ބުންޏެވެ. "ދެން އަބަދު ވެސް އަހަންނާ ވަރަށް ގާތްކޮށް އުޅޭ ހަތަރު ފަސް ވަރަކަށް މީހުން އުޅޭނެ. އެ މީހުންނާ ބައްދަލުކޮށް ވާހަކަ ދެއްކުން ވެސް އޮންނާނީ ގޭގައި. އެހެންވީމަ އާއިލާ އާއި ގާތް މީހުންނަކީ އަހަންނަށް އަބަދު ވެސް ވަރަށް މުހިއްމު ބައެއް."

ސަލްމާން ބުނި ގޮތުގައި ޕްރޮޑިއުސަރުންނާއި ޑައިރެކްޓަރުން އޭނަ އަށް ހުށަހަޅާ ފިލްމުތަކުގެ ނެރޭޝަންތައް ވެސް ކުރިއަށް ދާނީ އާންމު ގޮތެއްގައި ގޭގަ އެވެ. އަދި ފިލްމެއްގެ ޝޫޓިން ކުރިއަށްދާ ނަމަ އޭނަގެ ތާލަކީ ގެއިން މަސައްކަތަށް އަދި މަސައްކަތުން ގެއަށް ދިއުން ކަމަށް ބުންޏެވެ.

ސަލްމާން ދެން އެންމެ އަވަހަށް ޝޫޓިން ފަށަން އޮތް ފިލްމަކީ ކަރަން ޖޯހަރްގެ ދަރުމާ ޕްރޮޑަކްޝަނުން ހަދަން ތައްޔާރީތައް ވަމުން އަންނަ ވަތަނީ ފިލްމު "ދަ ބުލް" އެވެ. ރިޕޯޓްތައް ބުނާ ގޮތުން "ޝޭރުޝާ" ގެ ޑައިރެކްޓަރު ވިޝްނީ ވަރުދާން ހަދާ އެ ފިލްމުގެ ޝޫޓިން ފަށާނީ އަންނަ އަހަރުގެ ފެބްރުއަރީ މަހުގެ ތެރޭގަ އެވެ.

ސަލްމާން ވަނީ އޭނަގެ ކުރިއަށް ހުރި ޕްރޮޖެކްޓްތަކުގެ ތެރޭގައި "ދަބަންގް 4" އާއި "ކިކް 2" ގެ އިތުރުން ޑައިރެކްޓަރު ސީރަޖް ބަރްޖަތިއާގެ ފިލްމެއް އޮތްކަން ވެސް ކަށަވަރުކޮށް ދީފަ އެވެ.