ޣައްޒާގައި ވެރިކަން ކުރާ ޙަމާސް ޖަމާޢަތާއި ޒަޔަނިސްޓު އިސްރާޢީލުގެ ޔަހޫދީންނާ ދެމެދު ވެފައިވާ ހަމަލަ ބަދަލު ކުރުން މެދުކަނޑައިލުމުގެ އެއްބަސްވުމުގެ މުއްދަތު ދެ ދުވަހަށް އިތުރު ކޮށްފައިވާ ކަން ޙަމާސް ޖަމާޢަތާއި ޤަޠަރުން ހާމަކޮށްފިއެވެ. ހަތަރު ދުވަހުގެ މި އެއްބަސްވުން ފުރަތަމަ އެކުލަވައިލާފައި ވަނީ ނޮވެންބަރު 24 ވީ ހޯމަ ދުވަހުގެ ނިޔަލަށެވެ.

"ހަމަލަ ބަދަލު ކުރުން މެދުކަނޑައިލާ، ޣައްޒާއަށް އިންސާނީ އެހީތެރިކަން ފޯރުކޮށްދޭން އެކުލަވައިލާފައިވާ އެއްބަސްވުމާ ގުޅޭ ގޮތުން ކުރަމުންދާ މަޝްވަރާތަކުގެ ދަށުން، އެއްބަސްވުމުގެ މުއްދަތު އިތުރު ދެ ދުވަހަށް ދަންމައިލަން ދެ ފަރާތުން ވެސް ވަނީ އެއްބަސްވެފައި،" އެއްބަސްވުން އެކުލަވައިލުމުގައި މެދުވެރިއެއްގެ ދައުރު އަދާކުރި ޤަޠަރުގެ ޚާރިޖީ ވުޒާރާގެ ތަރުޖަމާނު މާޖިދް އަލް-އަންޞާރީ ވިދާޅުވިއެވެ.

ޤަޠަރުގެ އިތުރުން މި ކަމުގައި މިޞްރާއި އެމެރިކާއިން ވެސް ދަނީ މެދުވެރިންގެ ދައުރު އަދާ ކުރަމުންނެވެ. ފުރަތަމަ އެއްބަސްވުމުގައި އޮތް މައިގަނޑު ޝަރުޠަކީ ޙަމާސްއިން ރަހީނު ކޮށްފައިވާ އަސީރުންގެ ތެރެއިން 50 މީހުން މިނިވަން ކުރުމެވެ. އަދި، ޔަހޫދީ ސިފައިން ހައްޔަރުކޮށް ޖަލަށްލާފައިވާ ފަލަސްޠީނުގެ ރައްޔިތުންގެ ތެރެއިން 150 މީހުން ދޫކޮށްލުމެވެ. އަދި، ޣައްޒާގައި ހާލުގައި ޖެހިފައިވާ 2.3 މިލިޔަން މުސްލިމުންނަށް ބޭނުންވާ އިންސާނީ އެހީތެރިކަން ފޯރުކޮށްދޭން ފެށުމެވެ.

Advertisement

"އެއްބަސްވުމުގެ މުއްދަތު އިތުރު ކުރެވޭނެ ކަމަށް އުންމީދު ކުރަން. ޙަމާސްއިން އިތުރު އަސީރުން މިނިވަން ކުރަން އެއްބަސްވެ، އެ ކަން އެއްބަސްވުމުގައި ލިޔެފި ނަމަ، މުއްދަތު އިތުރު ކުރެވޭނެ ކަމަށް ބެލެވޭ. ޙަމާސްއިން މިހާރު ވެސް ވަނީ އިތުރު އަސީރުން މިނިވަން ކުރަން ނިންމާފައި. އަދި، އެއްބަސްވުމުގެ މުއްދަތު ދެ ދުވަހަށް އިތުރު ކުރަން އާނބަސް ބުނެފައި. މިއީ، ޣައްޒާގެ ރައްޔިތުންނަށް ހެވާއި ލާބަ ހުރި ގޮތަކީ،" ޙަމާސް ޖަމާޢަތުގެ އިސް އޮފިޝަލެއް ކަމުގައިވާ ޣާޒީ ޙަމަދް ވިދާޅުވިއެވެ.

ޙަމާސްއިން ބޭނުން ވަނީ ޣައްޒާގެ މުސްލިމުންނާ ދެކޮޅަށް ޔަހޫދީން ފަށާފައިވާ ހަނގުރާމައަށް ނިމުމެއް ގެނައުން ކަމަށާއި، މި ވަގުތު ހަމަލަ ބަދަލު ކުރުން ވަގުތީ ގޮތުން މެދުކަނޑައިލާފައި އޮތް ނަމަވެސް، އެ ކަން ދަމަހައްޓަން އެ ޖަމާޢަތުން ބޭނުންވާ ކަމުގައި ވެސް ޙަމަދް ވިދާޅުވިއެވެ. އަދި، މި ކަމުގައި ޤަޠަރާއި މިޞްރުގެ އިތުރުން ހުޅަނގުގެ ބައެއް ޤައުމުތަކުން ފޯރުކޮށްދެމުންދާ އެހީތެރިކަން އޭނާ ފާހަގަ ކުރެއްވިއެވެ.

ޙަމާސް-އިސްރާޢީލް އެއްބަސްވުމުގެ ފުރަތަމަ ތިން ދުވަހުގެ ތެރޭގައި ޙަމާސްއިން ވަނީ އަސީރުންގެ ތެރެއިން 39 މީހުން މިނިވަން ކޮށްފައެވެ. އަދި، ޔަހޫދީން ވެސް ވަނީ އެ ކި ކުށްތަކުގެ ތުހުމަތުގައި ހައްޔަރު ކޮށްފައިވާ ފަލަސްޠީނުގެ 117 މީހުން ދޫކޮށްލާފައެވެ. އޭގެ ތެރޭގައި ގިނައީ ކުޑަކުދިންނާއި، އަންހެނުންނާއި ޒުވާން އުމުރުފުރައިގެ ކުދިންނެވެ. ޙަމާސްއިން ދޫކޮށްލާފައިވާ އަސީރުންގެ ތެރޭގައި ތައިލެންޑުގެ 17 ރައްޔިތުންނާއި ފިލިޕީންސާއި ރަޝިޔާގެ ދެ މީހުން ހިމެނެއެވެ. ރަޝިޔާ މީހަކީ އިސްރާޢީލުގެ ރަށްވެހިކަން އޮންނަ މީހެކެވެ.

ޣައްޒާގައި ޔަހޫދީން ހިންގަމުން ދިޔަ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 14,800 އަށް އަރައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 36,000 އަށް އަރައެވެ.