ޗެމްޕިއަންސް ލީގުގެ ގްރޫޕް ސްޓޭޖުގައި ރޭ ތުރުކީގެ ގަލަތަސަރާއީއާ 3-3 އިން އެއްވަރުވެ، މުބާރާތުން ކެޓުމުގެ ބިރާ މެންޗެސްޓާ ޔުނައިޓެޑުން ކުރިމަތިލާން ޖެހިއްޖެ އެވެ.

ގްރޫޕް ސްޓޭޖުގައި ބާކީ ކޮންމެ ޓީމަކަށް ވެސް އެއް މެޗު އޮތްއިރު ޔުނައިޓެޑް އޮތީ ފަސް މެޗުން ލިބުނު 4 ޕޮއިންޓާ އެކު ގްރޫޕްގެ ފުލުގަ އެވެ. ތިންވަނައިގައި 5 ޕޮއިންޓާ އެކު ގަލަތަސަރާއީ އޮތްއިރު ދެވަނައިގައި އޮތް ކޮޕަންހޭގަން އަށް ވެސް ވަނީ 5 ޕޮއިންޓު ލިބިފަ އެވެ. އެޓީމަށް ކުރި ލިބެނީ ގޯލުގެ ތަފާތުންނެވެ. މި ގްރޫޕުގެ އެއްވަނައިގައި އަދި އަނެއް ބުރުން ޖާގަ ކަށަވަރުކޮށްފައިވާ ބަޔާން މިއުނިކަށް ވަނީ 13 ޕޮއިންޓު ލިބިފަ އެވެ.

ދެވަނަ ބުރަށް ދިޔުމުގެ އަމިއްލަ ބާރު ޔުނައިޓެޑަށް މިހާރު ގެއްލިފައިވާއިރު، އެޓީމަށް ދެވަނަ ބުރަށް މިހާރު ދެވެން އޮތީ ގްރޫޕްގެ ފަހު މެޗުގައި ބަޔާންއާ ދެކޮޅަށް ކުޅޭ މެޗުން މޮޅުވެ އަދި ގްރޫޕްގެ ފަހު މެޗުގައި ގަލަތަސަރާއީ އާއި ކޮޕަންހޭގަން ބައްދަލުކުރާ މެޗު އެއްވަރުވެގެންނެވެ.

Advertisement

ގަލަތަސަރާއީގެ ދަނޑުގައި ކުޅުނު މި މެޗުގެ ފުރަތަމަ 20 މިނެޓް ތެރޭ ޔުނައިޓެޑުން ވަނީ ދެ ގޯލުގެ ލީޑެއް ނަގާފަ އެވެ. ޔުނައިޓެޑްގެ ފުރަތަމަ ގޯލު މެޗުގެ 11 ވަނަ މިނެޓްގައި އަލްހެންޑްރޯ ގަނާޗޯ ކާމިޔާބުކޮށްދިންއިރު އެޓީމުގެ ދެވަނަ ގޯލު އޭގެ 7 މިނެޓް ފަހުން ކާމިޔާބުކޮށްދިނީ ބްރޫނޯ ފެނާންޑޭސް އެވެ. ބްރޫނޯ މި ގޯލު ކާމިޔާބު ކުރީ ގަލަތަސަރާއީގެ ޕެނަލްޓީއޭރިއާގެ ބޭރުގައި ހުރެ ފޮނުވާލި ބާރު ހަމަލާއަކުންނެވެ.

ޔުނައިޓެޑުން ރަނގަޅަށް ކުޅެމުންދަނިކޮށް މެޗުގެ 29 ވަނަ މިނެޓްގައި ހަކީމް ޒިޔެކް ވަނީ ހިލޭޖެހުމަކުން ގަލަތަސަރާއީގެ ފުރަތަމަ ގޯލު ކާމިޔާބުކޮށްދީފަ އެވެ. ޔުނައިޓެޑް ލީޑުގައި އޮވެ ފުރަތަމަ ހާފް ނިމުނުއިރު މެޗުގެ 55 ވަނަ މިނެޓްގައި ސްކޮޓް މެކްޓޮމިނޭ ވަނީ ޔުނައިޓެޑްގެ ތިިންވަނަ ގޯލު ކާމިޔާބުކޮށްދީފަ އެވެ. މެޗުގެ 62 ވަނަ މިނެޓްގައި ގަލަތަސަރާއީގެ ދެވަނަ ގޯލު ވެސް ހިލޭޖެހުމަކުން ކާމިޔާބުކޮށްދިނީ ޒިޔެކް ކަމަށްވާއިރު މި ގޯލަކީ ޔުނައިޓެޑްގެ ގޯލްކީޕަރު އަންދްރޭ އޮނާނާގެ އަތުން ހެދުނު ގޯހަކުންނެވެ. އަދި މެޗުގެ 71 ވަނަ މިނެޓްގައި މުހައްމަދު ކަރީމް ވަނީ ގަލަތަސަރާއީގެ ތިންވަނަ ގޯލު ކާމިޔާބުކޮށްދީ ނަތީޖާ އެއްވަރުކޮށްދީފަ އެވެ.

މެޗުގެ ފަހު 20 މިނެޓްތެރޭ މެޗުން މޮޅުވާން ޔުނައިޓެޑަށް ރަނގަޅު ފުރުސަތުތަކެއް ލިބިފައިވެ އެވެ. އެގޮތުން ބްރޫނޯ ދުރުން ފޮނުވާލި ހަމަލާއެއް ގަލަތަސަރާއީގެ ގޯލުގެ ދަނޑި އަށް އަމާޒުވިއިރު ޔުނައިޓެޑްގެ ޒުވާން ވިންގާ ފަކުންޑޯ ޕެލެސްޓްރީ އަށް ހުސްކޮށް ޖަހަން ލިބުނު ފުރުސަތު ދިފާއުކުރީ ގަލަތަސަރާއީގެ ކީޕަރެވެ.

މި ގްރޫޕްގައި ރޭ ބަޔާން މިއުނިކާއި ކޮޕަންހޭގަން ބައްދަލުކުރި މެޗު ނިމުނީ ގޯލެއް ނުޖެހި އެއްވަރުވެގެންނެވެ.