ޓެނިހުން މިހާތަނަށް ގިނަ ކާމިޔާބީތަކެއް ހޯދާފައިވާ މަޝްހޫރު ތަރި ރަފައެލް ނަޑާލް އަލުން އަނެއްކާ ވެސް އެ ކުޅިވަރަށް އެނބުރި އަންނަން ތައްޔާރުވާން ފަށައިފި އެވެ.

ސްޕެއިނަށް އުފަން 37 އަހަރުގެ ނަޑާލް ބުނީ އިންޖަރީގައި ހުންނަތާ ދުވަސްތަކެއް ފަހުން، އަންނަ މަހު ބާއްވާ މުބާރާތެއްގައި ވާދަކުރާނެ ކަމަށެވެ. އެއީ އަންނަ މަހު ފަށާ ބްރިސްބޭން އިންޓަނޭޝަނަލްގަ އެވެ.

"އެ މުބާރާތުގައި ޖެނުއަރީ މަހުގެ ފުރަތަމަ ހަފުތާގެ ތެރޭގައި އަހަރެން ޓެނިސް ކޯޓުން ފެންނާނެ،" އިއްޔެ ސޯޝަލް މީޑިއާގައި އާންމުކުރި ވީޑިއޯ ޕޯސްޓެއްގައި ނަޑާލް ބުންޏެވެ. "މިއީ މުބާރާތްތަކާ ދުރުގައި ހުންނަތާ ދުވަސްތަކެއް ފަހުން އަހަރެންގެ އެނބުރި އައުން. އަދި މިއީ އަހަރެން އެނބުރި އަންނަން ވެސް ވީ ވަގުތު ކަމަށް ގަބޫލުކުރަނީ."

Advertisement

އޭނަ އެންމެ ފަހުން ވާދަކުރި މުބާރާތަކީ ޖެނުއަރީގައި އޮތް އޮސްޓްރޭލިއަން އޯޕަންގަ އެވެ. އެ ފަހަރު ޗެމްޕިއަންކަން ދިފާއު ކުރަން ނުކުތް ނަޑާލަށް މެޗު ތެރެއިން ލިބުނު އަނިޔާއަކާ ގުޅިގެން، އެމެރިކާގެ މެކެންޒީ މެކްޑޮނާލްޑް އަތުން ބަލިވެގެން މުބާރާތުން ކަޓައިގެން ދިޔަ އެވެ. އަދި އެއީ މިއީ 2016 ގެ ފަހުން އޭނަ އޮސްޓްރޭލިއަން އޯޕަން އިން އެންމެ އަވަހަށް ކެޓި ފަހަރެވެ.

އަނިޔާއާ ގުޅިގެން މި އަހަރުގެ ޖޫން މަހުގެ ތެރޭގައި ނަޑާލް ވަނީ އުނަގަނޑުގެ އޮޕަރޭޝަނެއް ކޮށްފަ އެވެ. އެހެންވެ އޭނަ އަށް ޖެހުނީ މިހާތަނަށް ޓެނިސް ކޯޓާ ދުރުގައި ހުންނާށެވެ.

ނަޑާލް އަކީ މިހާތަނަށް ގްރޭންޑް ސްލޭމް ޗެމްޕިއަންކަން 22 ފަހަރު ހޯދާފައިވާ ކުޅުންތެރިއެކެވެ. ފާއިތުވި 17 އަހަރުގެ ތެރޭގައި އޭނަ ގަދަ 10 އިން ވެއްޓުނީ މި އަހަރުގެ މާޗްގަ އެވެެ. ވޯލްޑް ރޭންކްގައި ނަޑާލް މިހާރު އޮތީ 662 ވަނައިގަ އެވެ.