ކަޕިލް ޝަރުމާގެ ކޮމެޑީ ޝޯ، ސޮނީ ޓީވީ ދޫކޮށްލައި ނެޓްފްލިކްސް އިން ގެނެސްދޭން ތައްޔާރުވަމުން އަންނަ އިރު، ކަޕިލްގެ ޓިމްގައު ކުރިން ހިމެނުނު މަޝްހޫރު ކޮމީޑިއަން ސުނިލް ގްރޯވާ ވެސް ޝޯއާ ގުޅިއްޖެ އެވެ.

އޭގެ ޕްރޮމޯ ވެސް މިހާރު ނެޓްފްލިކްސް އިން ވަނީ އާންމުކޮށްފަ އެވެ. އޭގައި ސުނިލް ވެސް ފެނިގެންދާ އިރު، ޝޯގެ ބައިވެރިންގެ ތެރޭގައި ކްރުޝްނާ އަބީޝެކް، ކިކޫ ޝްރަދާ، އަރްޗަނާ ޕްރާން ސިންގް އަދި ރަޖީވް ތާކޫރް ހިމެނެ އެވެ.

"ދަ ކަޕިލް ޝަރުމާ ޝޯ" ސޮނީ ޓީވީން މެދުކަނޑާލީ މި އަހަރުގެ ޖޫން މަހުގެ ތެރޭގަ އެވެ. އަދި ކަޕިލް އޭނަގެ ޓީމާ އެކީ ނެޓްފްލިކްސް އަށް އަންނަން އުޅޭކަން އިއުލާންކުރީ މިދިޔަ މަހުގެ ތެރޭގަ އެވެ. މިއާ އެކީ ސުނިލް އެ ޓީމާ ގުޅުން ވާނީ ޝޯގެ ބެލުންތެރިންގެ ދުވަސްވީ ހުވަފެނެއް ހަގީގަތަކަށްވުމެވެ.

Advertisement

ސަބަބަކީ ކަޕިލްގެ ޝޯގައި ސުނިލް ގެނެސްދިން ކެރެކްޓާތައް ބެލުންތެރިންގެ މެދުގައި ވަރަށް ބޮޑު މަގުބޫލު ކަމެއް ހޯދާފައިވުމެވެ. އެގޮތުން އޭނަގެ ޑރ. މަޝްހޫރު ގްލާޓީ ކެރެކްޓާ އަކީ ބެލުންތެރިން ވަރަށް ބަލައިގަތް ކެރެކްޓާއެކެވެ. ކަޕިލްގެ ޝޯއާ ހުނަރުވެރި ކޮމީޑިއަން ގުޅިފައި މި ވަނީ ހައެއްކަ އަހަރުގެ މެދުކެނޑުމަކަށް ފަހު އެވެ.

ކަޕިލް އާއި ސުނިލްގެ ގުޅުމުގައި ކުނި ޖެހުނީ އޮސްޓްރޭލިއާ އަށް ޝޯ ދޭން ކުރި ދަތުރެއްގެ މަތީގައި ކަޕިލް ބޯޓްތެރޭގައި މަސްތުވެގެން ސުނިލްއާ ހިންގި މާރާމާރީއަކާ ގުޅިގެންނެވެ. އާ ޝޯގެ ޕްރޮމޯގައި ވެސް އޮސްޓްރޭލިއާ ދަތުރުގެ ވާހަކަ ދެ ފަންނާނުން މާ ނޫން ކަމަށް ހެދިފައި ދައްކާފައިވެ އެވެ.

ކަޕިލްގެ ޝޯ ނެޓްފްލިކްސް އިން ވަރަށް އަވަހަށް ގެނެސްދޭނެކަން އިއުލާންކުރި ނަމަވެސް އަދި ވަކި ތާރީހެއް ނުނިންމަ އެވެ.