އަންނަ އަހަރުގެ ނޮވެމްބަރުގެ ތެރެގައި ގެނެސްދޭ ގޮތަށް މި އަހަރުގެ ޖޫންގައި އިއުލާންކުރި އަކްޝޭ ކުމާރުގެ ފިލްމު "ހައުސްފުލް 5" 2025 އަށް ފަސްކޮށްފި އެވެ.

ސާޖިދު ނަދިއަދުވާލާ ޕްރޮޑިއުސްކުރާ މި ފިލްމު މިހާރު ތާވަލުކޮށްފައި ވަނީ ޖޫން 6، 2025 އަށެވެ. ފިލްމު ފަސްކުރީ މީގެ ވީއެފްއެކްސް އަށް ކުރަން ޖެހޭ މަސައްކަތް ގިނަކަމުން ކަމަށާއި ފިލްމުން ވަރަށް ހިތްގައިމު ވީއެފްއެކްސް ގެނެސްދޭނެކަމުގެ ޔަގީންކަން ދީފައިވެ އެވެ.

ބޮލީވުޑްގެ އެންމެ މަގުބޫލު ކޮމެޑީ ފްރެންޗައިޒްތަކުގެ ތެރޭގައި ހިމެނޭ "ހައުސްފުލް 5" ޑައިރެކްޓްކުރަނީ 2008 ގެ "ދޯސްތާނާ" އާއި 2019 ގެ "ޑްރައިވް" ގެނެސްދިން ތަރޫން މަންސުކާނީ އެވެ.

Advertisement

މި ފްރެންޗައިޒްގެ ކުރީގެ ހަތަރު ފިލްމާ އެއްގޮތަށް ކާސްޓްގައި އަކްޝޭ އާއި ރިތޭޝް ދޭޝްމުކް ހިމެނޭނެކަން ކަށަވަރު ނަމަވެސް، ދެން ފިލްމު ފެންނާނީ ކޮން ބައެއް ކަމެއް އަދި ނޭނގެ އެވެ. ފިލްމުގެ ކާސްޓާ ބެހޭ ގޮތުން ދާދި ފަހުން މީޑިއާތަކުގައި ފެތުރުނި ވާހަކަތަކެއް ސާހިދުގެ ކުންފުނި، ނަދިއަދުވާލާ ގްރޭންޑްސަން އިން ދޮގުކޮށްފައިވެ އެވެ.

ދެހާސް ދިހައެއްގެ "ހައުސްފުލް" އާއި 2012 ގެ "ހައުސްފުލް 2" ގެ ޑައިރެކްޓްކުރީ ސާޖިދު ޚާނެވެ. އަދި 2016 ގެ "ހައުސްފުލް 3" އާއި 2019 ގެ "ހައުސްފުލް 4" ޑައިރެކްޓްކުރީ ފަރުހާދު ސަމްޖީ އެވެ. މިއިން ކޮންމެ ފިލްމެއްގައި ވެސް އަކްޝޭ އާއި ރިތޭޝްއާ އެކީ ބޮޑު ކާސްޓެއް ގެނެސްދީފައިވެ އެވެ.