މި އަހަރު ރިލީޒްކުރާ ޝާހްރުކް ޚާންގެ ތިން ވަނަ ފިލްމު "ޑަންކީ" ގެ ޓްރެއިލާ މިއަދު އާންމުންނަށް ދޫކޮށްލައިފި އެވެ.

މި މަހުގެ 21 ގައި ސިނަމާތަކުގައި އަޅުވަން ހަމަޖެހިފައިވާ މި ފިލްމަކީ ހިޖުރަކުރުމާ ގުޅޭ ގޮތުން، ކުޅަދާނަ ޑައިރެކްޓަރު ރާޖްކުމާރު ހިރާނީ ހަދާފައިވާ ސޯޝަލް ކޮމެޑީއެކެވެ. އޭނަ އަކީ "ސަންޖޫ" އާއި "ޕީކޭ" އާއި "3 އިޑިއަޓްސް" އަދި "މުންނާއީބާއީ" ގެނެސްދިން ޑައިރެކްޓަރެވެ.

މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ޑަންކީ" ގައި ޝާހްރުކާ އެކީ ބަތަލާގެ ރޯލުން ފެންނާނީ ތާޕްސީ ޕައްނޫ އެވެ. ފިލްމުގެ އިތުރު ކާސްޓުންގެ ތެރޭގައި ވިކީ ކޯޝަލް، ބޮމަން އިރާނީ، ސަތިޝް ޝާހް އަދި ދަރުމެންދުރާ ހިމެނެ އެވެ.

Advertisement

ޖެނުއަރީގައި ރިލީޒްކުރި "ޕަތާން" އާއި ސެޕްޓެމްބަރުގައި ރިލީޒްކުރި "ޖަވާން" ގައި ޝާހްރުކް ވަރުގަދަ އެކްޝަން ރޯލުތަކަކުން ފެނުނު ނަމަވެސް "ޑަންކީ" ގައި އޭނަ ފެންނަނީ ވަރަށް ސާދާ ރޯލަކުންނެވެ.

ފިލްމީ ޚަބަރުތައް ދިރާސާކުރާ ފަރާތްތަކުން ލަފާކޮށްފައިވާ ގޮތުގައި މި ފިލްމަކީ މި އަހަރު ގެނެސްދިން ޝާހްރުކްގެ އަނެއް ދެ ފިލްމުހާ ކާމިޔާބު ފިލްމަކަށް ވާނެ އެވެ. އެކަމަކު "ޑަންކީ" ރިލީޒްކުރާތާ އެއް ދުވަސް ފަހުން ޕްރަބާސްގެ އެކްޝަން ތުރިލާ "ސަލާރު" ރިލީޒްކުރަން ހަމަޖެހިފައިވާތީ މީގެ ސަބަބުން ވިޔަފާރި އަށް ކޮންމެވެސް ވަރެއްގެ އަސަރެއް ކުރާނެ ކަމަށް ބެލެވެ އެވެ.