މި އަހަރުގެ އެންމެ ކާމިޔާބު ހިންދީ ފިލްމުތަކުގެ ތެރޭގައި ހިމެނޭ ޑައިރެކްޓަރު ކަރަން ޖޯހަރްގެ "ރޮކީ އޯރް ރާނީ ކީ ޕްރޭމް ކަހާނީ" ޓީވީން ބެލުންތެރިންނަށް ގެނެސްދޭން ނިންމައިފި އެވެ.

މި އަހަރުގެ ޖުލައި 28 ގައި ސިނަމާތަކުގައި ރިލީޒްކުރި ފިލްމު މި މަހުގެ 24 ގައި ޕްރީމިއާކުރަން ހަމަޖެހިފައި ވަނީ ކަލާސް ސިނެޕްލެކްސްއިންނެވެ. އެހެންވެ މިއީ "ރޮކީ އޯރް ރާނީ ކީ ޕްރޭމް ކަހާނީ" އަދި ނުބަލާ މީހުންނަށް ގޭގެ ސިޓިންރޫމްގައި ތިބެގެން ފިލްމު ބަލައިލަން ލިބޭ ފުރަތަމަ ފުރުސަތެވެ.

މި ފިލްމު ޓީވީ އަށް ދޫކޮށްލާ އިރު، ސެޕްޓެމްބަރު މަހު ވަނީ އެމެޒޯން ޕްރައިމް ވީޑިއޯ އަށް ވެސް ދޫކޮށްފަ އެެވެ.

Advertisement

ރޮމޭންޓިކް ކޮމެޑީއެއްގެ ގޮތުގައި ގެނެސްދިން "ރޮކީ އޯރް ރާނީ ކީ ޕްރޭމް ކަހާނީ" ގެ ލީޑް ރޯލު ކުޅުނީ ރަންވީރު ސިންގް އާއި އާލިއާ ބަޓެވެ. އިތުރު ކާސްޓުންގެ ތެރޭގައި ޖަޔާ ބައްޗަން، ދަރުމެންދުރާ އަދި ޝަބާނާ އާޒްމީ ހިމެނެ އެވެ.

ޖުމްލަ 160 ކްރޯޑް ރުޕީސް (19.2 މިލިއަން ޑޮލަރު) ގެ ބަޖެޓަކުން ހެދި ފިލްމަށް ބޮކްސް އޮފީހުގައި 355.61 ކްރޯޑް ރުޕީސް (43 މިލިއަން ޑޮލަރު) ލިބުނެވެ.

"ރޮކީ އޯރް ރާނީ ކީ ޕްރޭމް ކަހާނީ" އަކީ "ކުޗް ކުޗް ހޯތާ" އާއި "ކަބީ ހުޝީ ކަބީ ޢަމް" އަދި "އޭ ދިލް ހެ މުޝްކިލް" ފަދަ ކާމިޔާބު ފިލްމުތައް ގެނެސްދިން ކަރަންގެ 7 ވަނަ ޑައިރެކްޝަނެވެ.