ފައިސާ ޗާޕް ކުރަން ރައްޔިތުންގެ މަޖިލީހުން ސަރުކާރަށް ދީފައި އޮތް ހުއްދަ ނިމުމަކަށް ގެނެސް، ދައުލަތުގެ ޚަރަދަށް ޒިންމާވުމުގެ ގާނޫނު އުވާލަން މާލީ ވުޒާރާއިން ރައްޔިތުންގެ މަޖިލީހުން ސަރުކާރަށް ރައްޔިތުންގެ މަޖިލީހަށް ހުށަހަޅައިފިއެވެ.

ކޮވިޑް-19ގެ ބަލިމަޑުކަމާއެކު އިގްތިސާދީ ތަދުމަޑުކަން ދިމާވުމާއެކު ސަރުކާރުން އެދިގެން ރައްޔިތުންގެ މަޖިލީހުން ވަނީ ދެ ފަހަރެއް މަތިން އަހަރު ދުވަހަށް ފައިސާ ޗާޕު ކުރުމުގެ ހުއްދަ ދީފައެވެ. އަދި ތިން ވަނަ ފަހަރަށް ފައިސާ ޗާޕު ކުރުމުގެ ހުއްދަ މި އަހަރުގެ ޑިސެމްބަރު މަހުގެ 31 ވަނަ ދުވަހުގެ ނިޔަލަށް ނިމުކަމަށް އަންނާނެއެވެ.

އެއީ ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ (ހ)، (ރ)، އަދި (ބ) ގައި ބަޔާންކޮށްފައިވާ އުސޫލުތަކާއި ހަމަތަކުން އިސްތިސްނާ ކުރުމަށް ހަމަ އެ ގާނޫނުން ރައްޔިތުންގެ މަޖިލީހަށް ދީފައިވާ ބާރެކެވެ.

Advertisement

މި ގާނޫނުގައި ބަޔާން ކޮށްފައި އޮންނަ ގޮތުން، އޯވަޑްރޯ ކުރެވޭނީ އެންމެ ފަހު ތިން އަހަރުގެ ދައުލަތުގެ އާމްދަނީގެ އެއް އިންސައްތައެވެ. އަދި އެ އަދަދު އެމްއެމްއޭއަށް 91 ދުވަހުގެ ތެރޭގައި ސަރުކާރުން އަނބުރާ ދައްކަން ޖެހޭނެއެވެ. އެކަމަކު ކޮވިޑް-19 ގެ ބަލިމަޑުކަމުގެ ހާލަތު ކުރިމަތިވެ ދައުލަތުގެ އާމްދަނީ ދަށްވުމުން، އަހަރު ދުވަހަށް އެ މާއްދާ އިސްތިސްނާ ކޮށްދޭން ސަރުކާރުން އެދުނީއެވެ.

މި ސަރުކާރުގެ މާލީ ވަޒީރު މުހައްމަދު ޝަފީގުގެ ސިޓީ އިއްވަމުން އަމީން އަާއްމު ވިދާޅުވީ، އިގްތިސޯދީ ހިސާބުތަކަށް ބަލާއިރު، 2022 ވަނަ އަހަރު ރާއްޖޭގެ ރިއަލް ޖީޑިޕީ ކޮވިޑްގެ ބަލި މަޑުކަމުގެ ކުރިން 2019 ވަނަަ އަހަރު ހުރި މިންވަރަށް ފަހަނައަޅާ ގޮސްފައި ކަމަށެވެ. އަދި 2022 ވަނަ އަހަރު ދައުލަތަށް ލިބުނު އާމްދަނީވެސް 2019 ވަނަ އަހަރު ލިބުނު އާމްދަނީއަށްވުރެ އިތުރުވެފައިވާ ކަމަށް އެ ސިޓީގައި ވެއެވެ.

"ވީމާ ދައުލަތުގެ ހަރަަދަށް ޒިންމާ ވުމުގެ ގާނޫނުގެ 36 ވަނަ މާއްދާގައި ބަޔާންކޮށްފައިވާ ހާލަތެއް މިހާރު ނެތުމުން 1 ޖެނުއަރީ 2024 ވަނަ ދުވަހުން ފެށިގެން މި ގާނޫނު ގާނޫނުގެ 32 ވަނަ މާއްދާގެ (ހ)، (ރ)، އަދި (ބ) އިސްތިސްނާ ކުރުން ނިމުމަކަށް ގެނެސް ދެއްވާ، މި ގާނޫނަށް ފުރިހަމައަށް އިޔާދަކޮށްދެއްވުން އެދެމެވެ.".

އަދި އޭގައި ވަނީ 2024 ވަނަ އަހަރު ހުށަހަޅާފައިވާ ބަޖެޓްގައި ދައުލަތުގެ ފައިނޭސިންގ ޕްލޭންގައި ރާވާފައިވާ ޕްލޭންގެ ފަދައިން އިސްތިސްނާ މުއްދަތު ހަމަވާއިރު، ދައުލަތުގެ ޕަބްލިކް ބޭންކް އޯވަރޑްރޯ ވެފައިވާ މިންވަރު އެއްކޮށް ސެކިއުރިޓްރައިޒްކޮށް އެމްއެމްއޭއިން ސަރުކާރަށް ދޭ ދިގު މުއްދަތުގެ ބޮންޑަކަށް ބަދަލު ކުރަން ރާވާފައިވާ ކަމަށްވެސް އެ ސިޓީގައި ވެއެވެ.

ޕަބްލިކް ބޭންކް އެކައުންޓް (ޕީބީއޭ) އިން ހައްދެއް ނެތި އޯވާޑްރޯ ކުރުމަކީ ނުވަތަ ފައިސާ ޗާޕް ކުރުމަކީ 2013 ގެ ކުރިން ސަރުކާރުތަކުގެ އާންމު އަމަލެކެވެ. ނަމަވެސް ކުރީގެ ރައީސް ޔާމީން ވެރިކަމަށް އައުމަށް ފަހު ސަރުކާރު ހިންގަން ބޭނުންވާ ފައިސާ ޗާޕް ކުރުން 2013 ގައި ހުއްޓާލިއެވެ. އޭގެ ބަދަލުގައި ޕީބީއޭ ބޭނުންކުރީ ހަމައެކަނި ސަރުކާރުގެ ދަރަނި އަދާ ކުރާށެވެ.