އޮސްޓްރޭލިއާ ގައި ބައިނަލްއަގްވާމީ ދަރިވަރުންނާއި ހުނަރު ކުޑަ މަސައްކަތްތެރިންނަށް ވިސާގެ ގަވާއިދުތައް ހަރުކަށިކޮށް، ކުރިއަށް އޮތް ދެ އަހަރު ތެރޭގައި ހިޖުރަކުރާ މީހުންގެ އަދަދު ދެބައިކުޅަ އެއްބައި މަދުކުރުމަށް ވަނީ ނިންމާފައެވެ.

އާ ސިޔާސަތުތަކުގެ ދަށުން ބައިނަލްއަގްވާމީ ދަރިވަރުންނަށް އިނގިރޭސި ޓެސްޓްތަކުން މަތީ ރޭޓިން ހޯދަން ޖެހޭނެ ކަމަށެވެ.

"އަޅުގަނޑުމެންގެ ސްޓްރެޓެޖީގެ ސަބަބުން ހިޖުރަކުރާ އަދަދު އާންމު ހާލަތަށް ގެނެވޭނެ،" މީޑިއާ ބްރީފިންގައި ހޯމް އެފެއާޒް މިނިސްޓަރު ކްލޭއާ އޮނީލް ވިދާޅުވި އެވެ.

ބޮޑުވަޒީރު އެންތޮނީ އަލްބަނީސް މިދިޔަ ހަފްތާ ބަންދުގައި ވިދާޅުވީ އޮސްޓްރޭލިއާގެ ހިޖުރަވެރިންގެ އަދަދު އަނބުރާ "ދެމެހެއްޓެނިވި ފެންވަރަކަށް" ގެންނަން ޖެހޭ ކަމަށާއި "ނިޒާމު ފަޅައިގެން ގޮސްފައިވާ" ކަމަށެވެ.

މި ނިންމުން ނިންމާފައި މިވަނީ 2022-23 ވަނަ އަހަރު ހިޖުރަކުރާ މީހުން ރެކޯޑް އަދަދަކަށް އަރާނެ ކަމަށް ބެލެވުނު ފަހުންނެވެ.

އޯނީލް ވިދާޅުވީ 2022-23 ވަނަ އަހަރު ގިނައިން ހިޖުރަކޮށްފައިވަނީ ބައިނަލްއަގްވާމީ ދަރިވަރުން ކަމަށެވެ.

ކޮވިޑް-19 ގެ ބަލިމަޑުކަމުގެ ސަބަބުން ހަރުކަށި ބޯޑަރު ކޮންޓްރޯލްތަކެއް ގެނައުމަށްފަހު ވިޔަފާރިތަކަށް މުވައްޒަފުން ހޯދުމަށް އެހީތެރިވުމަށް މިދިޔަ އަހަރު ހިޖުރަކުރާ އަދަދު އިތުރުކުރި އެވެ.

އެކަމަކު ކުއްލިއަކަށް ބިދޭސީ މަސައްކަތްތެރިންނާއި ދަރިވަރުން އިތުރުވުމުން ކުލީގެ އަގުތަށް ބޮޑުވެ، ގެދޮރު ނެތް މީހުންގެ އަދަދު ވަނީ އިތުރުވެފަ އެވެ.

މިހާރު ދުނިޔޭގެ އެންމެ ހަރުކަށި އެއް ލޭބަރ މާކެޓަށް ސަޕްލައި ކުރުމަށް އިމިގްރޭޝަނަށް ގިނަ ދުވަސްތަކެއް ވަންދެން ބަރޯސާވެފައިވާ އޮސްޓްރޭލިއާގެ ލޭބަރ ސަރުކާރުން ވަނީ މަތީ ހުނަރުވެރި މަސައްކަތްތެރިން ވަނުން އަވަސްކޮށް، ދާއިމީ ދިރިއުޅުމުގެ މަގު އޮމާން ކުރުމަށް ބާރު އަޅާފައެވެ.

މިބަދަލުގެ ސަބަބުން ހުނަރުވެރި މަސައްކަތްތެރިންނަށް އާ ސްޕެޝަލިސްޓް ވިސާއެއް ގާއިމްކޮށް، ތަރައްގީވެފައިވާ އެހެން އިގްތިސާދުތަކާ އެކު ވަރުގަދަ ވާދަވެރިކަމެއްގެ ތެރޭގައި ވިޔަފާރިތަކަށް މަތީ ފެންވަރުގެ ހިޖުރަވެރިން ހޯދުމަށް އެހީތެރިވެދޭނެ އެވެ.