އެމެރިކާގެ މަޝްހޫރު ލަވަކިޔުންތެރިޔާ ސެލީނާ ގޮމޭޒް އާ ބައިވެރިޔަކު ހޯދައިފި އެވެ.

އޭނަ އާއި ޕްރޮޑިއުސަރު ބެނީ ބްލާންކޯ ޑޭޓްކުރަމުން އަންނަ ކަމަށް ބުނެ ފޭން ޕޭޖެއްގައި ފޭނުންތަކެއް ކުރި ޕޯސްޓްތަކަކާ ގުޅިގެން ސެލީނާ ކުރި ކޮމެންޓްތަކެއްގައި ވަނީ ބެނީއާ ޑޭޓްކުރަމުން އަންނަކަން ކަށަވަރުކޮށްދީ، އެ މީހުންގެ ގުޅުމަށް މިހާރު ހަ މަސްވެފައިވާ ކަމަށް ވެސް ބުނެފަ އެވެ.

ސެލީނާ، 31، ބުނީ ބެނީ އަކީ އޭނައާ މިހާތަނަށް ދިމާވީ އެންމެ ރަނގަޅު މީހާ ކަމަށާއި ގުޅުމާ މެދު ވަރަށް އުފަލުން ހުރި ކަމަށެވެ.

Advertisement

"މި ވަރުގެ މީހަކާ އަދި މިހާތަނަށް ދިމައެއް ނުވޭ." ކާމިޔާބު އަލްބަމްތަކެއް ނެރެފައިވާ ފަންނާނު ބުންޏެވެ.

އެމެރިކާގެ ވާޖިނިއާ އުފަން ބެނީ، 35، އަކީ ރެކޯޑް ޕްރޮޑިއުސަރެކެވެ. އޭނައާ އެކީ މިހާތަނަށް ވަރަށް ގިނަ ފަންނާނުން މަސައްކަތްކޮށްފައިވެ އެވެ. އޭގެ ތެރޭގައި ޚުދު ސެލީނާ ވެސް ހިމެނޭ އިރު، އޭނަގެ ކުރީގެ ލޯބިވެރިޔާ ޖަސްޓިން ބީބާ އާއި ސަ ވީކެންޑްގެ އިތުރުން އެޑް ޝީރަން، ކެޓީ ޕެރީ، ރިއާނާ، ބްރިޓްނީ ސްޕިއާސް، ސިއާ، ކަންޔޭ ވެސްޓް އަދި ކީތު އާބަން ފަދަ އެތައް ފަންނާނުނެއް ހިމެނެ އެވެ.

ސެލީނާ އަކީ ލަވަކިޔުންތެރިއެއްގެ އިތުރުން ބަތަލާއެކެވެ. އަދި އޭނަ އަކީ ވިޔަފާވެރިއެއް ވެސް މެ އެވެ.