ޖަރުމަންގެ މަޝްހޫރު ކުންފުނި، ޕޫމާ އިން އިޒްރޭލުގެ ގައުމީ ފުޓްބޯޅަ ޓީމަށް އަންނަ އަހަރުން ފެށިގެން ސްޕޮންސަ ނުދޭން ނިންމައިފި އެވެ.

މިކަމާ ގުޅޭ ގޮތުން އެ ކުންފުނިން ބުނީ އިޒްރޭލުގެ ގައުމީ ފުޓްބޯޅަ ޓީމާ އެކީ ހަދާފައި އޮތް ސްޕޮންސަޝިޕް އެއްބަސްވުން އަންނަ އަހަރުގެ ތެރޭގައި ހަމަވާނެ ކަމަށާއި އޭގެ ފަހުން އެއްބަސްވުން އާ ނުކުރަން ނިންމާފައިވާ ކަމަށެވެ. ދުނިޔޭގެ ސްޕޯޓްސް ވެއާގެ އެންމެ މަޝްހޫރު ބްރޭންޑްތަކުގެ ތެރޭގައި ހިމެނޭ ޕޫމާ އިން މި ގޮތަށް ނިންމީ އިޒްރޭލުން ފަލަސްތީނާ ދެކޮޅަށް ލާއިންސާނީ ޖަރީމާތައް ހިންގަމުންދާ އިރު، އެފަދަ ބަޔަކަށް އެހީތެރިކަންދޭތީ އަމާޒުވެފައިވާ ފާޑުކިޔުންތަކާ ގުޅިގެންނެވެ.

ބައެއް ފަރާތްތަކުން ޕޫމާ ބޮއިކޮޓް ކުރަން ވެސް ގޮވާފައިވެ އެވެ.

Advertisement

މިދިޔަ މއޮކްޓޯބަރު މަހުގެ 7 އިން ފެށިގެން އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމާ ގުޅިގެން ހުޅަނގުގެ މަޝްހޫރު އެކި ބްރޭންޑްތައް ބޮއިކޮޓްކުރަން ގޮވާލައި ކެމްޕޭންތައް އަންނަނީ ހިންގަމުންނެވެ. އޭގެ ތެރޭގައި ސްޓާބަކްސް، ކޭއެފްސީ، ކޮކަ ކޯލާ، މެކްޑޮނަލްޑްސް، ނެސްލޭ އަދި ޒާރާ ފަދަ ބްރޭންޑްތައް ހިމެނެ އެވެ.

އިޒްރޭލުން ވަނީ އޮކްޓޯބަރު 7 ގެ ފަހުން ފަލަސްތީނުގެ 16،000 އަށް ވުރެ ގިނަ މީހުން ޝަހީދުކޮށްފައިވެ އެވެ. މީގެ ތެރޭގައި ގިނައީ ކުޑަކުދިންނާއި އަންހެނުންނެވެ.