ބަލިތަކުން ދިފާޢުވުމަށް ކުޑަކުދިންނަށް ދޭ ވެކްސިން ޣައްޒާއިން ހުސްވެފައިވާ ކަމަށް ފަލަސްޠީނުގެ ސިއްޙީ ވުޒަރާއިން ބުނެފިއެވެ.

ފަލަސްޠީނުގެ ސިއްޙީ ވުޒަރާއިން ބުނީ، ވެކްސިން ހުސްވުމުން ޣައްޒާ ސިއްޙީ ނުރައްކަލަށް އަނެއްކާވެސް ހުށަހެޅިފައިވާ ކަމަށެވެ.

ވީހާވެސް އަވަސް ގޮތެއްގައި ވެކްސިން ޣައްޒާއަށް ފޯރުކޮށްދިނުމަށް ބައިނަލްއަޤުވާމީ މުޖުތަމަޢުއަށް އެ ވުޒާރާއިން ވަނީ ގޮވައިލައިފައެވެ.

Advertisement

އެކަން އިއުލާންކޮށްފައިވަނީ ޢިސްރާއީލުން ޣައްޒާއާ ދޭ ހަމަލާތަކަށް ދެ މަހަށް ވުރެ ގިނަ ދުވަސްވީ ފަހުންނެވެ. ވެކްސިން ހުސްވުމުގެ އިތުރުން ބޭހާއި ބޭސް ފަރުވާއަށް ބޭނުންވާ ސާމާނު ނުލިބި، ތޮއްޖެހުމުގެ ސަބަބުން ތަފާތު އެތައް ބަލިތަކެއް ފެތުރި ޣައްޒާގައި ވަގުތީ ހިޔާތައް ހުންނަ ސަރަޙައްދުތަކުގެ ސިއްޙީ ޙާލަތު ވަރަށް ގޯސްވެފައިވާ ކަމަށް ބައިނަލްއަޤުވާމީ އެހީދޭ ޖަމިއްޔާތަކުން ބުނެއެވެ.

ނަމަވެސް ހުސްވެފައި ވަނީ ކޮން ވެކްސިނެއް ކަމެއް އެ ވުޒާރާއިން ހާމަކޮށްފައެއްނުވެއެވެ.

ޣައްޒާގެ ސިއްޙީ ނިޒާމު ވަރަށް ބޮޑަށް ބޮއްސުންލައިފައިވާ ކަމަށް ދުނިޔޭގެ ސިއްޙަތު ޖަމިއްޔާގެ ޑިރެކްޓާ ޖެނެރަލް ޓެޑްރޮސް އަދަނޮމް ގެބްރިޔެސަސް ވަނީ ވިދާޅުވެފައެވެ. އެގޮތުން ޣައްޒާގައި ހުރި 36 ހޮސްޕިޓަލުގެ ތެރެއިން 14 ހޮސްޕިޓަލެއްގެ މަސައްކަތް ހުއްޓިފައިވާ ކަމަށް ޓެޑްރޮސް ވިދާޅުވިއެވެ. ސިއްޙީ ޙާލަތު އިތުރަށް ގޯސްވަމުންދާނެ ކަމަށްވެސް އޭނާ ވަނީ ވިދާޅުވެފައެވެ.

ފަލަސްޠީނުގެ ސިއްޙީ ވުޒާރާއިން އެންމެ ފަހުން އާންމުކުރި ހިސާބުތަކުން ދައްކާ ގޮތުގައި ޢިސްރާއީލުން ޣައްޒާއާ ދެކޮޅަށް އޮކްޓޫބަރު މަހު ހަތް ވަނަ ދުވަހު ފެށި ހަނގުރާމައަށް 68 ދުވަސްވެފައިވާއިރު، މިހާތަނަށް 18،412 އަށް ވުރެ ގިނަ މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ. ޙަމަލާތަކުގައި ޒަޚަމްކޮށްލައިފައިވާ މީހުންގެ ޢަދަދު 50،100 އަށް އަރައިފައެވެ.