ވޭތުވެދިޔަ 3 މަސް ދުވަސް ތެރޭގައި ގަވާއިދާ ހިލާފަށް ޕާކުކޮށްގެން ކޮށްފައިވާ ޖޫރިމަނާތައް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާފުކޮށްދެއްވައިފިއެވެ.

ރައީސް އޮފީހުގައި މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ރައީސް އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ މުހައްމަދު ފިރުޒުލް ވިދާޅުވީ، ރައީސުލް ޖުމްހޫރިއްޔާ ޑރ. މުހައްމަދު މުއިއްޒު ރިޔާސީ ކެމްޕޭނުގެ ތެރޭގައި ވައުދުވެވަޑައިގެންނެވި ގޮތަށް، ޕާކު ކުރާނެ ތަނެއް ނުދައްކާ ސްޓިކާ ޖެހުމުގެ ސަބަބުން، މިިދިޔަ ސަރުކާރުގެ ނިޔަލަށް އަރާފައިވާ ޕާކިންގ ޖޫރިމަނާތައް މާފުކޮށްދީފައިވާކަމަށެވެ.

ޕާކުކުރާނެ ތަނެއް ނުދައްކާ ސްޓިކާ ނުޖަހާނެކަމަށް ނިމިދިޔަ ސަރުކާރުން ވެފައިވާ ވައުދާ ހިލާފަށް ކުރި ޕާކިން ޖޫރިމަނާގެ އަދަދު ވަނީ 2.8 މިލިއަނަށް އަރާފައެވެ. އަދި މި ޖޫރިމަނާތައް މާފުކޮށްދެއްވާނެކަމަށް ރައީސް ޑރ. މުއިއްޒުގެ ވެރިކަމުގެ ފުރަތަމަ 100 ދުވަހުގެ ވައުދުގައި ހިމަނާފައިވެއެވެ.  

Advertisement