ރައީސް ޑރ. މުހައްމަދު މުއިއްޒު ވެރިކަން ހޯއްދެވީ އޮޅުވާލައިގެން ކަމަށް ގިނަ ރައްޔިތުން މިއަދު ގަބޫލުކުރާ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު ވިދާޅުވެއްޖެ އެވެ.

ޖަމީލު އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް މުޢިއްޒު ކެމްޕެއިން ބިނާކުރީ ކުރީގެ ރައީސް ޔާމީނުގެ ޙުކުމްތަކަކީ ޙަރާން ޙުކުމްތަކެއް ކަމަށާއި އިންޑިޔާ ސިފައިން ތިބެގެން ނުވާނެ ކަމަށް ބުނަމުން ކަމަށެވެ. އަދި މިއަދު ޖިނާއީ އަދި މަދަނީ އަދުލޭ ކިޔާ އޮޅުވާލަން ޖާގައެއް ނެތް ކަމަށްވެސް ޖަމީލު ވިދާޅުވި އެވެ.

"ވެރިކަން ފުރޮޅިއްޖެ. ރަައީސް ޔާމީނަށް ލުޔެއްވެސް ނުލިބޭ. ޙުކުމްވެސް އަވަސް ނުވޭ. އިންޑިޔާ ސިފައިން ފުރަތަމަ ހަފުތާ ފާއިތުވި އިރު ތިބި ކަމެއް، އަދި އަދަދު ވެސް ނޭނގޭ. މިއީ ސަމާސާއެއް ނޫން،" ޖަމީލު ވިދާޅުވި އެވެ.

Advertisement

ޖަމީލު ވިދާޅުވީ ގިނަ ރައްޔިތުން މިއަދު ގަބޫލުކުރަނީ ރައީސް މުއިއްޒު ވެރިކަން ހޯއްދެވީ އޮޅުވާލައިގެން ކަމަށެވެ. އެހެންކަމުން ވެރިކަމުގެ މޯރަލް ލެޖިޓިމަސީ ވެސް ގެއްލިފައިވާ ކަމަށް ވިދާޅުވި އެވެ.

މިވަގުތު 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ޔާމީން ވެރިކަމުގެ ފުރަތަމަ ދުވަހު މިނިވަން ކުރައްވާނެ ކަމަށް ރިޔާސީ އިންތިހާބުގެ ތެރޭގައި ރައީސް މުއިއްޒު ވަނީ ވިދާޅުވެފަ އެވެ. ޔާމީން މިވަގުތު ހުންނެވީ ގޭ ބަންދުގައި ކަމަށްވާއިރު އެމަނިކުފާނަށް އިއްވި ހުކުމުގެ އިސްތިއުނާފް ޝަރީއަތް މިހާރު ވަނީ ނިމިފަ އެވެ. ދެން އޮންނާނީ ހުކުމް އިއްވުމެވެ.

ޔާމީން ދާދިފަހުން ވަނީ ޕީޕީއެމްގެ ލީޑަޝިޕާއި މެދު ހިތްހަމަޖެހިވަޑައިނުގެން އެ ޕާޓީން ވަކިވެ އާ ސިޔާސީ ޕާޓީއެއް އުފެއްދުމުގެ މަސައްކަތް ވެސް ފައްޓަވާފަ އެވެ. އެ ޕާޓީ އަށް މިދިޔަ ހަފްތާގައި ޔާމީން ވަނީ ސޮއިކުރައްވާފަ އެވެ.