އޮކްޓޫބަރު މަހުގެ ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ފަލަސްޠީނުގެ ޣައްޒާއަށް ދެމުންގެންދާ ޢުދުވާނީ ޙަމަލާތަކުގައި ފަލަސްޠީނުގެ 19،453 މީހުން ޝަހީދުކޮށްލައިފައިވާ ކަމަށް ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެފިއެވެ. ޔަހޫދީންގެ ޙަމަލާތަކުގައި ޒަޚަމްވި މީހުންގެ ޢަދަދު ވަނީ 52،286އަށް އަރައިފައެވެ.

ހަނގުރާމަ ފެށިފަހުން ޣައްޒާގައި 1،680 ޤަތުލުޢާންމުން ޔަހޫދީން ހިންގައިފައިވާ ކަމަށް ފަލަސްޠީނުގެ ދަޢުލަތުގެ މީޑިއާ އޮފީހުން ބުނެއެވެ. ޙަމަލާތަކުގައި ސުންނާފަތިވެފައިވާ ޢިމާރާތްތަކުގެ ދަށުގައި ނުވަތަ ވީނުވީއެއް ނޭނގި ގެއްލިފައިވާ 7،000 މީހުން ވެސް ހިމެނޭ ކަމަށް މީޑިއާ އޮފީހުން ބުނެއެވެ. އޭގެ ތެރެއިން 70 އިންސައްތަ މީހުންނަކީ ކުޑަކުދިންނާއި އަންހެނުންނެވެ.

މީގެ އިތުރުން ޣައްޒާގެ ދެކުނުގެ ސަރަޙައްދުތަކަށް ޔަހޫދީން ދޭ ވައިގެ ޙަމަލާތައް ވަރުގަދަވުމުން ޣައްޒާއަށް ބޭނުންވާ އިންސާނީ އެހީ ފޯރުކޮށްދިނުމަށް ހުރަސްއެޅި ކާނާއާއި ބޯފެން ހޯދުމަށް ވަނީ ދަތިވެފައެވެ.

Advertisement

ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ ޖަރީމާތަކުގެ ސަބަބުން ޣައްޒާގެ 1.9 މިލިއަން މީހުންނަށް ވަނީ އެ މީހުންގެ ގެދޮރު ދޫކޮށްދާން މަޖުބޫރުވެފައެވެ. އެއީ ޣައްޒާގެ އާބާދީގެ ގާތްގަޑަކަށް 80 އިންސައްތަ މީހުންނެވެ.