ބޭންކް އޮފް މޯލްޑިވްސް (ބީއެމްއެލް) ގެ ކާޑު މެދުވެރިކޮށް ރާއްޖެއިން ބޭރުގައި ކިޔަވަމުންދާ ދަރިވަރުންނަށް ޑޮލަރު ނެގޭ ލިމިޓު 1200 ޑޮލަރަށް ބޮޑުކުރަން ނިންމައިފި އެވެ.

ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމެއްގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޒިމް އިބްރާހީމް ވިދާޅުވީ، ރާއްޖެއިން ބޭރުގައި ކިޔަވާ ދިވެހި ދަރިވަރުންނަށް ޑޮލަރު ނެގޭ ލިމިޓު 1200 ޑޮލަރަށް ބޮޑުކުރަން ސަރުކާރުން މިހާރު ނިންމާފައިވާ ކަމަށެވެ.

ނާޒިމް ވިދާޅުވީ، ބީއެމްއެލްގެ ޑެބިޓް އަދި ކްރެޑިޓް ކާޑު ބޭނުންކޮށްގެން ޑޮލަރު ނެގުން ރާއްޖޭން ބޭރުގައި ކިޔަވާ ކުދިން ލިމިޓްވެފައި އޮތުމުގެ ސަބަބުން އެ ކުދިންނަށް ދަތި އުނދަގޫތަކާއި ކުރިމަތިލާން ޖެހިފައިވާ ކަމަށެވެ. މީގެ އިތުރުން ނާޒިމް ވިދާޅުވީ ކެބިނެޓްގެ މަޝްވަރާއަށް ފަހު އަންނަ 2024 ވަނަ އަހަރުގެ ފެބްރުއަރީ މަހުގެ އެއް ވަނަ ދުވަހުން ފެށިގެން ޑޮލަރު ލިމިޓް 1200 އަށް އިތުރު ކުރުމަށް ނިންމަވާފައިވާކަމަށެވެ.

Advertisement

ރާއްޖެއިން ބޭރުގައި ކިޔަވާ ކުދިންނަށް މިހާރު ޑޮލަރު ލިމިޓްގެ ގޮތުގައި ކަނޑައަޅާފައިވަނީ 750 ޑޮލަރެވެ.