އީރާނުން ޔޫރޭނިއަމް އުފެއްދުން އަވަސްކޮށްފައިވާ ކަމަށް ރިޕޯޓްތައް ބުނާތީ އެމެރިކާއިން ކަންބޮޑުވުން ފާޅުކޮށްފިއެވެ.

ވައިޓް ހައުސްގެ ނޭޝަނަލް ސެކިއުރިޓީ ކައުންސިލްގެ ތަރުޖަމާނަކު މި ވާހަކަ ދެއްކެވީ އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އިން ނެރުނު ރިޕޯޓަކަށް ރައްދު ދިނުމުގެ ގޮތުންނެވެ.

"އީރާނުގެ ނިއުކްލިއާ ބާރުގަދަވުމަކީ އީރާނުގެ ތާއީދު އޮންނަ ޖަމާޢަތްތަކުން މި ސަރަހައްދުގައި ނުރައްކާތެރި ހަރަކާތްތައް ކުރިއަށްދާ ދަނޑިވަޅެއްގައި އިތުރަށް ކަންބޮޑުވާ ކަމެއް، އޭގެ ތެރޭގައި ދާދި ފަހުން އިރާގާއި ސީރިއާގައި ދިން ޑްރޯން ހަމަލާއާއި އެހެނިހެން ހަމަލާތަކާއި ރަތް ކަނޑުގައި ވިޔަފާރި ބޯޓުފަހަރުތަކަށް ހޫތީން ދިން ހަމަލާތައް ހިމެނޭ،" އެމެރިކާގެ ތަރުޖަމާނު ވިދާޅުވި އެވެ.

Advertisement

އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އިން ނެރުނު ރިޕޯޓުގައި ބުނެފައި ވަނީ އީރާނުން ފާއިތުވި ހަފްތާތަކުގައި ހަތިޔާރު އުފެއްދުމަށް ބޭނުންވާ ޔޫރޭނިއަމް އުފައްދާ ރޭޓް އިތުރުކޮށްފައި ވާކަމަށެވެ.

އައިއޭއީއޭ އިން ބުނީ ނޮވެމްބަރު މަހުގެ ފަހުކޮޅު އިރާންގެ ނަޓަންޒް އާއި ފޯޑޯގެ ފެސިލިޓީތަކުގައި ޔުރޭނިއަމް އުފެއްދުމުގެ ރޭޓް އިތުރުވެފައިވާކަން އެ އިދާރާގެ އިންސްޕެކްޓަރުން ޔަގީންކޮށްފައިވާ ކަމަށެވެ.

އީރާނުގެ އެޓޮމިކް އެނާޖީ ޗީފް ވަނީ މިރިޕޯޓްތައް ދޮގުކުރައްވައި، އީރާނުން "އާ ކަމެއް ނުކުރާ" ކަމަށާއި "ގަވާއިދުތަކާ އެއްގޮތަށް" މަސައްކަތް ކުރަމުން އަންނަ ކަމަށް ވިދާޅުވެފަ އެވެ.

އީރާނުގެ އޮފިޝަލުން ތަކުރާރުކޮށް ބުނަމުން އައީ ނިއުކްލިއާ ހަތިޔާރު އުފެއްދުމާ ގުޅޭ ގޮތުން އެއްވެސް ޕްލޭނެއް ނުވަތަ ނިޔަތެއް ނެތް ކަމަށެވެ.