އިސްލާމް ދީނުގައި އީދު ފާހަގަ ކުރުމަކީ ޝަހްވަތްތަކުގެ ފަހަތުން ދިއުމެއް ނޫން ކަމަށާއި އެއީ ﷲ ގެ ހައްދުތަކާއި ހުރުމަތްތައް ގިރާ ކުރުމަށް ހުޅުވައިލެވޭ ދޮރެއް ނޫން ކަމަށް އީދު ހުތުބާގައި ބުނެފިއެވެ.

ރާއްޖޭގެ އެކިކަންކޮޅުތަކުގައި މިއަދު އިއްވި އީދު ހުތުބާގައި ބުނީ އިސްލާމް ދީނުގައި އީދުތަކަކީ ﷲ ގެ އަމުރުފުޅުތަކަށް ކިޔަމަންވެގަތުމާ ގުޅިގެން ވިދިގެން އަންނަ ދުވަސްތަކެއް ކަމަށެވެ. އަޟްހާ އީދު ހައްޖުގެ އަޅުކަމާ ގުޅިފައިވާ އިރު، އެއީ ޒަމާންތަކާ އެކު ތާއަބަދަށް ދެމިގެންދަނިވި މަތިވެރި ޒިކުރާތަކާ ގުޅިފައިވާ އީދެއް ކަމަށް ވެސް އީދު ހުތުބާގައި ބުނެފައިވެއެވެ.

"އިސްލާމީ އީދަކީ އެކަނިވެރިޔާ، އޭނާގެ އާއިލާގެ މަތިން، ބިދޭސީ މީހާ، އޭނާގެ ގައުމުގެ މަތިން، ބީރައްޓެހި މީހާ، އޭނާގެ ރައްޓެހިން މަތިން، ޔަތީމް ކުއްޖާ އޭނާގެ މައިންބަފައިންގެ މަތިން ހަނދާންކޮށްދޭ ދުވަހެވެ. މިއަދަކީ މި ހުރިހާ އެންމެންނަށް މާތް ހަނދުމަވާންވީ ދުވަހެވެ." ހުތުބާގައި ބުނެފައިވެއެވެ.

Advertisement

އީދު ދުވަހަކީ ގުރުބާން ކުރުމުގެ ދުވަސްކަން ފާހަގަކޮށް އީދު ހުތުބާގައި ބުނެފައި ވަނީ މިއީ މާތް ﷲ ގެ ރަސޫލުބޭކަލުން ކަމުގައިވާ އިބްރާހިމްގެފާނަށާއި އެކަލާނގެފާނުގެ ދަރިކަލުން އިސްމާއިލްގެފާނަށް މާތް ﷲ އިނާމު ދެއްވި ދުވަސް ކަމަށެވެ. އެއީ އެ ދެބަފައިކަލުންނާ މާތް ﷲ ކުރިމަތި ކުރެއްވި ބޮޑު އިމްތިހާނުން ފާސްވެވަޑައިގަތުމުގެ އިނާމް ކަމަށް ވެސް އީދު ހުތުބާގައިވެއެވެ.

ހުތުބާގައި ބުނީ އިސްމާއިލްގެފާނު ދެއްކެވި ކިޔަމަންތެރިކަމަކީ މިއަދުގެ ޒުވާނުންނަށް ލިބިގެންވާ ހެޔޮ ނަމޫނާއެއް ކަމަށެވެ. ދަރީން މައިންބަފައިންނަށް ކިޔަމަން ގަންނަން ޖެހޭ ކަމުގެ ދިރި ހުރި މިސާލެއް ކަމަށާއި އުޟްހިޔާ ކަތިލާ ދުވަހު ހަނދާނަށް ގެނެސް ދެނީ މި މަތިވެރި ޒިކުރާ ކަމަށް ހުތުބާގައި ބުނެފައިވެއެވެ.

ހުތުބާގައި ބުނި ގޮތުގައި މާތް ﷲ އީދު ޝަރްއު ކުރެއްވީ އުންމަތުގެ އެއްބައިވަންތަކަން ދެމެހެއްޓުމަށެވެ. އެކެއްގެ ކެކުޅުންތައް އަނެކަކު ބަރުދާސްތުކޮށް އެންމެން އެކަތިގަނޑަކަށް ވުމަށް ކަމަށް ވެސް ހުތުބާގައިވެއެވެ.

"އީދާއި ހައްޖަކީ ސުލްހަމަސްލަސްކަން ގެނުވައިދޭ އަޅުކަންކަމެވެ. ކޮންމެ ހައްޖެއްގައި ވެސް ހައްޖުވެރިއަކަށް ވެސް އަނެކާ އަށް ހުރުމަތްތެރިކޮށް ހިތަން ދަސްވެއެވެ." ހުތުބާގައިވެއެވެ.

އީދު ހުތުބާގައި ވަނީ އީދަކީ އުފާ ފާޅު ކުރުމުގެ ދުވަސް ކަން ފާހަގަކޮށް މި ދުވަސް ފާހަގަ ކުރަން ވާނީ ﷲ ކަނޑައަޅުއްވާފައިވާ އިމުގެ ތެރެއިން ކަމަށް ބުނެފައެވެ. ކުޅިވަރު ކުޅުމާއި އުފާ ކުރުމާއި ކެއުން ބުއިމަކީ އީދުގެ އުފަލުގެ ބައެއް ކަމަށާއި އީދު ފާހަގަ ކުރަން ވާނީ ބަޔަކު ކޮޕީކޮށްގެން ނޫން ކަމަށް ހުތުބާގައި ބުނެފައިވެއެވެ.