ޑެންމާކުގެ ރާނީ މާގްރެތު 2 ވަނަ 52 އަހަރަށް ފަހު މަޤާމުން ވަކިވެޑައިގަންނަވަން ނިންމަވައިފައިވާކަން ޢިއުލާނުކުރައްވައިފިއެވެ.

އެ ކަމަނާ ރަސްމީކޮށް މަޤާމުން ވަކިވެވަޑައިގަންނަވާނީ މި މަހުގެ 14 ވަނަ ދުވަހުއެވެ. މަޤާމުން ވަކިވެވަޑައިގަންނަވާކަން ރާނީ މާގްރެތު 2 ޢިއުލާނުކުރެއްވީ ޓީވީ މެދުކުރައްވައި ދެއްވެވި ޚިޠާބެއްގައެވެ.

ޢުމުރުފުޅުން 83 އަހަރުގެ މާގްރެތު 2 ވަނައަކީ މިހާރު ދުނިޔޭގައި ހުންނެވި ހަމައެކަނި ރާނީއެވެ. އަދި އޭނާއަކީ މިހާރު ދުނިޔޭގައި ހުންނެވި ޤައުމުތަކުގެ އިސްވެރިންގެ ތެރެއިން އެންމެ ގިނަ ދުވަހު ރަނިކަން ކުރެއްވި ބޭފުޅާއެވެ. 1972 ވަނަ އަހަރު ތަޚުތަށް އިސްވެވަޑައިގެންނެވި ރާނީ މާގުރެތު ވެވަޑައިގެންފައި ވަނީ 2022 ވަނަ އަހަރުގެ ސެޕްޓެމްބަރު މަހު އިނގިރޭސިވިލާތުގެ ރާނީ އެލިޒަބަތު ދެވަނަ އަވަހާރަވުމުން ވިލާތުގައި އެންމެ ގިނަ ދުވަހު ރަނިކަން ކުރެއްވި ރާނީއަށެވެ.

މަޤާމުން ދުރުވެވަޑައިގެންނެވުމަށް ވިސްނާވަޑައިގަތީ މި އަހަރުގެ ކުރީކޮޅު ކުރެއްވި އޮޕަރޭޝަނަކަށް ފަހުއެވެ. "އެ އޮޕަރޭޝަންގެ ސަބަބުން މުސްތަޤުބަލާ މެދު ވިސްނަން ފެށިން. ރަނިކަމުގެ ޒިންމާ އަންނަން އޮތް ޖީލަށް ދޫކޮށްލަންވީ ވަޤުތު އައިސްފިތޯ ވިސްނިން." ރާނީ މާގްރެތު ވިދާޅުވިއެވެ.

ރާނީ މާގްރެތު މަގާމުން ވަކިވަޑައިގަތުމުން އެ މަގާމަށް ދެން އައްޔަން ކުރާނީ ދޮށީ ދަރިފުޅު އަދި ވަލީއަޙުދު ފްރެޑިކްއެވެ. އިނގިރޭސިވިލާތުގެ ޝާހީ ސަޤާފަތާ ހިލާފަށް އުމުރުން 55 އަހަރުގެ ވަލީއަޙުދު ފްރެޑްރިކް ޑެންމާކުގެ ރަސްކަމާ ހަވާލުވެވަޑައިގެންނެވި ނަމަވެސް ބޮޑު ހަފުލާއެއް ނުބާއްވާނެއެވެ.

ޑެންމާކުގެ ކުރީގެ ރަސްގެފާނު ފްރެޑްރިކް ނުވަވަނައާއި ރާނީ އިންގްރިޑަށް 1940 ވަނަ އަހަރު ލިބިވަޑައިގެންނެވި ރާނީ މާގްރެތަކީ ވިސްނުންތޫނު އަދި އުފެއްދުންތެރި ބޭކަނބަލެކެވެ. 1953 ވަނަ އަހަރު ޢުމުރުފުޅުން 31 އަހަރުގައި ބައްޕާފުޅުގެ ވާރިސަކަށް ވެވަޑައިގަތީ ޑެންމާކުގެ ޤާނޫނު އަސާސީއަށް ގެނައި އިޞްލާޙަކުން އަންހެނުންނަށް ތަޚުތު ވާރުތަވުމުގެ ޙުއްދަ ދިނުމުންނެވެ.

ރާނީ މާގްރެތަކީ ޑެންމާކުގެ މީހުންނަށް ވަރަށް މަގުބޫލު ޝަހުސިއްޔަތެކެވެ. އެ ޤައުމުގެ ގިނަ ބަޔަކު އެދިގެން ތިބީ ރާނީ މާގްރެތުގެ މުޅި ޢުމުރަށް ތަޚުތުގައި އިންނެވުމަށެވެ.

ޑެއިޒީގެ ނަމުން މަޝްހޫރު ރާނީ މާގްރެތަކީ ދުންފަތުގެ އިސްތިއުމާލު ކުރުމުގެ އާދަޔާ ދުރު، މޯބައިލް ފޯނާއި އިންޓަނެޓުގެ ވަޞީލަތްތައް ބޭނުންކުރައްވާ ކަނބަލެއް ނޫނެވެ. ފޯނާއި އިންޓަނެޓާއި ނުލައި ދިރިއުޅުން މާ އުފާވެރި ކަމަށް އެ ކަމަނާ ވިދާޅުވެއެވެ. ރާނީ މާގްރެތު ފަންނުވެރިކަމަށް ވެސް ވަރަށް ލޯބިކުރައްވައެވެ. އޭނާ ކިޔަވާވިދާޅުވީ އިނގިރޭސިވިލާތުންނެވެ.

ރާނީ މާގްރެތުވަނީ 1967 ވަނަ އަހަރު ފްރާންސްގެ ޑިޕްލޮމެޓް ހެންރީ ޑި ލަބޯޑޭ ޑި މޮންޕެޒާޓާއި ކައިވެނި ބައްލަވައިގަތެވެ. ނަމަވެސް 2018 ވަނަ އަހަރު ހެންރީ ވަނީ އަވަހާރަވެފައެވެ.